আলফা (স্বাঃ)ৰ দুৰ্ধৰ্ষ নেতা দৃষ্টি ৰাজখোৱাক বিচাৰি বাংলাদেশত অভিযান
বাংলাদেশ সুৰক্ষা বাহিনীয়ে চিলেট অঞ্চলত আলফা(স্বা:)ৰ এগৰাকী দুৰ্ধৰ্ষ নেতাক বিচাৰি অভিযান চলাই থকাৰ কথা এক সূত্ৰৰ পৰা জানিব পৰা গৈছে।
যোৱা সপ্তাহত পাকিস্তান উচ্চায়ুক্ত ইমৰান আহমেদ ছিদ্দিকে জাফলং অঞ্চলত চুটী অতিবাহিত কৰি থকাৰ সময়তে উক্ত অঞ্চলত শীৰ্ষ আলফা নেতাজনেও বাহৰ পাতি থকাৰ কথা জানিছিল দেশখনৰ চোৰাংচোৱা সংস্থাই।
ইমৰানে চিলেটলৈ বি এন পিৰ মেয়ৰ আৰিফুল হক চৌধুৰীক সাক্ষাৎ কৰিব আহিছিল। কিন্তু চৌধুৰীয়ে শেষ মূহুৰ্তত ইমৰানক সাক্ষাৎ নকৰাৰ সিদ্ধান্ত গ্ৰহণ কৰে।
অৱশ্যে চিলেট কৰ্পৰেশ্যনৰ মুখ্য কাৰ্যবাহী বিষয়াই পাকিস্তানৰ উচ্চাযুক্ত গৰাকীক সাক্ষাৎ কৰে।
‘জাফলং ৰিজৰ্টত ছিদ্দিক আৰু সেই একে সময়তে উক্ত অঞ্চলত দৃষ্টি ৰাজখোৱাৰ উপস্থিতিয়ে এখন গোপন বৈঠকত মিলিত হোৱাৰ সন্দেহ জগাই তুলিছে’, এগৰাকী বিষয়াই এইদৰে কয়।
‘আমি ঘটনাৰ সবিশেষ উদ্ঘাটনৰ চেষ্টা চলাই আছো’, বিষয়াগৰাকীয়ে কয়।
ইফালে আলফাৰ শেহতীয়া এই গতিবিধিত কিছু শংকিত হৈ পৰিছে ভাৰতীয় চোৰাংচোৱা সংস্থা।
‘পাকিস্তানে ধাকাস্থিত উচ্চ আয়ুক্তৰ ব্যৱহাৰৰ পুৰণা খেলখনৰ জৰিয়তে ভাৰতৰ উত্তৰ-পূবত পুনৰ সমস্যা সৃষ্টি কৰাৰ চেষ্টা চলাইছে’, প্ৰাক্তন ইণ্টেলিজেন্স বিউৰ’ বিষয়া বেণু ঘোষে এইদৰে কয়।
ভাৰতীয় চোৰাংচোৱা সংস্থাই লাভ কৰা তথ্য অনুসৰি বৰ্তমান পৰেশ বৰুৱাৰ পিছতে আলফা (স্বা)ৰ দ্বিতীয় গৰাকী প্ৰধান সেনা ৰাজখোৱা এই মাহৰ প্ৰথমতে মেঘালয়ৰ গাৰো পাহৰৰ মেন্দিপথাৰত আছিল।
ইফালে নাম প্ৰকাশৰ পৰা অনিচ্ছুক এগৰাকী চোৰাংচোৱা বিষয়াই কয়, ‘নিশ্চয় এক উদ্দেশ্যে লৈয়ে দৃষ্টি ৰাজখোৱাই সীমা পাৰ হৈছিল’।
উল্লেখ্য যে, পৰেশ বৰুৱাই সংগঠনটোৰ অসমৰ পশ্চিম অঞ্চলৰ গতি বিধি ৰাজখোৱাৰ ওপৰত নিৰ্ভৰ কৰিয়েই চলি আছে আৰু তেওঁ চিনা-বাৰ্মিজ সীমান্তৰ তেনচং-ৰুইলি অঞ্চলত নিৰাপদে আছে।
স্মৰ্তব্য যে, ২০০৯ চনৰ সংসদীয় নিৰ্বাচনৰ পূৰ্বেও বাংলাদেশৰ সুৰক্ষা বাহিনীয়ে দৃষ্টি ৰাজখোৱাক কৰায়ত্ত কৰাৰ আপ্ৰাণ চেষ্টা চলাইছিল।