বিশ্বৰ আটাইতকৈ ক্ষুদ্ৰ কম্পিউটাৰ চিপ উৎপাদন কৰিব পৰা প্ৰযুক্তি উন্মোচন কৰিলে IBM-য়ে
ইন্টাৰনেশ্যনেল বিজনেছ মেছিনছ কৰ্পোৰেশ্যন (আই বি এম)-য়ে বৃহস্পতিবাৰে উন্মোচন কৰিলে বিশ্বৰ প্ৰথমটো প্ৰযুক্তি যিয়ে এক নেন’মিটাৰতকৈও সৰু চিপ উৎপাদন কৰিব পাৰে। কিয়নো টেক কোম্পানীসমূহে ক্ৰমান্বয়ে চাহিদা বৃদ্ধি হোৱা এআইৰ কামৰ বোজা চম্ভালিব পৰা অৰ্ধপৰিবাহী নিৰ্মাণৰ দৌৰত নামি পৰিছে।
এই ঘোষণা এনে এটা সময়ত কৰা হৈছে যেতিয়া চিপ নিৰ্মাতাসকলে দশক দশক ধৰি অধিক কম্পিউটিং পাৱাৰ কম স্পেচত ধৰি ৰখাৰ ধাৰাটো বজাই ৰখাৰ উপায় বিচাৰিছে, যিটো পৰিঘটনা মূৰৰ নিয়ম (Moore’s Law) নামেৰে জনাজাত।
চুক্তিবদ্ধ চিপ নিৰ্মাতা টি এছ এম চি আৰু ইণ্টেলৰ সৈতে প্ৰতিযোগিতাত অৱতীৰ্ণ হ’বলৈ আই বি এমৰ স্থিতি শক্তিশালী কৰা এই নতুন চিপ প্ৰযুক্তিটোৰ আছে এক ০.৭ নেন’মিটাৰ ট্ৰেঞ্জিষ্টৰ আৰ্কিটেকচাৰ বা ৭ এংষ্ট্ৰম।
যোৱা সপ্তাহত ইণ্টেলে কৈছিল যে ১.৮ নেন’মিটাৰ চিপ নিৰ্মাণ কৰা ইয়াৰ ১৮এ উৎপাদন প্ৰক্ৰিয়াৰ নতুন প্ৰজন্মই ৰিস্ক প্ৰডাকচনলৈ গতি কৰিছে, যিটো বাণিজ্যিক উৎপাদনৰ পূৰ্বে এক পৰীক্ষামূলক পৰ্যায়।
আই বি এমৰ মতে ০.৭ নেন’মিটাৰ চিপে প্ৰায় ১০০ বিলিয়ন ট্ৰেঞ্জিষ্টৰ আঙুলিৰ নখৰ আকাৰৰ পৃষ্ঠত ধৰি ৰাখে, যিটো ২০২১ চনত উন্মোচন কৰা ২ নেন’মিটাৰ চিপৰ ঘনত্বৰ প্ৰায় দুগুণ। ই ৫০% পৰ্যন্ত উচ্চ কাৰ্যক্ষমতা বা ৭০% অধিক শক্তি কাৰ্যক্ষমতা প্ৰদান কৰে।
ইয়াত উপনীত হ’বলৈ আই বি এম-এ “নেন’ষ্টেক” নামৰ এটা নতুন ট্ৰেঞ্জিষ্টৰ ডিজাইন প্ৰস্তুত কৰিছিল। ট্ৰেঞ্জিষ্টৰবোৰ সমতল কৰি ৰখাৰ পৰিৱৰ্তে ইয়াৰ ডিজাইনে ইটোৱে সিটোৰ ওপৰত তিনিটা মাত্ৰাত সজাই একে আয়তনৰ স্থানত অধিক নিকপকপীয়াকৈ বান্ধি ৰাখে।
আই বি এম ৰিচাৰ্চৰ পৰিচালক জে গাম্বেট্টাই কয় যে আমাৰ নতুন নেন’ষ্টেক আৰ্কিটেকচাৰৰ জৰিয়তে আমি কেৱল সৰু ট্ৰেঞ্জিষ্টৰ নিৰ্মাণেই কৰা নাই, আমি পুনৰ উদ্ভাৱন কৰিছো যে কেনেকৈ চিপ নিৰ্মাণ কৰি নাটকীয়ভাৱে অধিক শক্তি আৰু কাৰ্যক্ষমতা প্ৰদান কৰিব পৰা যায়।
আই বি এমৰ মতে পাঁচ বছৰৰ ভিতৰত ইয়াৰ উৎপাদন আৰম্ভ হ’ব পাৰে। কোম্পানীটোৱে পূৰ্বতে চেমচাং আৰু জাপানৰ ৰেপিডাছক চিপ প্ৰযুক্তিৰ অনুজ্ঞাপত্ৰ প্ৰদান কৰিছিল। অৱশ্যে এই প্ৰযুক্তিৰ বাবে ইয়াৰ উৎপাদন অংশীদাৰৰ কথা ঘোষণা কৰা নাই।