ৰেংকিঙত ভুলৰ বাবে ক্ষমা বিচাৰিলে আইচিচিয়ে; ভাৰতৰ টেষ্ট ৰেংকিং কিমান?

ভুলটো আইচিচিৰ। তেওঁলোকৰ ভুলৰ বাবে বাতৰিটো বিয়পি পৰিছিল। বুধবাৰে প্ৰকাশিত আইচিচি ৰেংকিঙত প্ৰথমবাৰৰ বাবে খবৰ পোৱা গৈছিল যে ভাৰত টেষ্ট ৰেংকিঙত এক নম্বৰ স্থানলৈ উন্নীত হৈছে। ইয়াৰ আগতে বগা বলৰ দুটা সংস্কৰণত ভাৰত এক নম্বৰ দল আছিল। অৰ্থাৎ, ভাৰত একে সময়তে তিনিটা সংস্কৰণৰ ৰেংকিঙৰ শীৰ্ষত উপনীত হোৱা দ্বিতীয়টো দল হিচাপে পৰিগণিত হয়।

ভাৰতীয় ক্ৰিকেট অনুৰাগীসকল সামাজিক মাধ্যমত বাতৰিটোক লৈ উৎসাহিত হৈ পৰিছিল। কিন্তু ভাৰতক টেষ্ট ৰেংকিঙৰ এক নম্বৰ দল হিচাপে দেখুওৱাৰ কেইঘণ্টামান পিছত আইচিচিয়ে সংশোধনী কৰে। আইচিচিয়ে এনে ভুলৰ বাবে ক্ষমা বিচাৰিছে।

আইচিচিয়ে এক বিবৃতিত কয়, “২০২৩ চনৰ ১৫ ফেব্ৰুৱাৰীত এক চমু কাৰিকৰী বিজুতিৰ বাবে ভাৰতক আইচিচি ৱেবছাইটত এক নম্বৰ দল হিচাপে দেখুওৱা হৈছে। এনে ত্ৰুটিৰ বাবে মই ক্ষমা বিচাৰিছো।”

সংশোধিত ৰেংকিং অনুসৰি অষ্ট্ৰেলিয়া এতিয়াও টেষ্ট ৰেংকিঙৰ শীৰ্ষত আছে। ২৯ খন খেলত তেওঁলোকৰ ৰেটিং পইণ্ট হৈছে ১২৬। শৃংখলাটোৰ প্ৰথমখন টেষ্টত তেওঁলোকক ইনিংছত পৰাজিত কৰা ভাৰত দ্বিতীয় স্থানত আছে। তেওঁলোকৰ ৰেটিং পইণ্ট হৈছে ১১৫। ইয়াৰ আগেয়ে দিনটোৰ প্ৰথম ৰেংকিঙত ভাৰতৰ ৰেটিং  ১১৫-ই আছিল যদিও অষ্ট্ৰেলিয়াৰ ১১১ বুলি দেখুওৱা হৈছিল।

মুঠতে ১ পইণ্টত আগবাঢ়ি থাকি অষ্ট্ৰেলিয়া বৰ্তমান সুৰক্ষিত স্থানতে আছে। অৱশ্যে, আইচিচি ৰেংকিং প্ৰিডিক্টৰৰ মতে ভাৰতে চাৰিখন খেলৰ বৰ্ডাৰ-গাভাস্কাৰ ট্ৰফীত দুখন মেচৰ ব্যৱধানত জিকিলেহে অষ্ট্ৰেলিয়াক অতিক্ৰমি শীৰ্ষস্থানলৈ উঠিব। সেয়েহে, বৰ্তমানলৈ দক্ষিণ আফ্ৰিকাৰ অনন্য সাফল্য অটুট আছে। তিনিটা সংস্কৰণৰ ৰেংকিঙৰ শীৰ্ষত থকা একমাত্ৰ দল হিচাপে অভিলেখ তেওঁলোকৰেই হাততে আছে।