আইচিচি টেষ্ট ৰেংকিং : কোহলীৰ অৱনতি আৰু জ’ ৰুটৰ উত্থান
চেন্নাই টেষ্টত ভাৰতৰ বিপক্ষে দ্বিশতকেৰে অদম্য প্ৰদৰ্শন আগবঢ়াই আইচিচিৰ টেষ্ট ৰেংকিঙত শেহতীয়াকৈ ইংলেণ্ডৰ মিডল অৰ্ডাৰ বেটছমেন জ’ ৰুটৰ স্থান তিনি নম্বৰলে উত্থান ঘটিছে। ইয়াৰ পূৰ্বে তেওঁ চতুৰ্থ স্থানত থকা টীম ইণ্ডিয়াৰ কেপ্টেইন বিৰাট কোহলীতকৈ এটা স্থানত পাছ পৰি পঞ্চম স্থানত আছিল।
আনহাতে শেহতীয়াকৈ টেষ্ট ক্ৰিকেটত আশানুৰূপ প্ৰদৰ্শন আগবঢ়াবলৈ সক্ষম নোহাৱা কোহলীৰ চতুৰ্থৰ্ পৰা পঞ্চম স্থানলে অৱনমিত হৈছে। নিউজিলেণ্ডৰ কেন উইলিয়ামছ আৰু অষ্ট্ৰেলিয়াৰ ষ্টিভ স্মিথে প্ৰথম আৰু দ্বিতীয় স্থান অক্ষুণ্ণ ৰাখিছে।
বেটিং ৰেংকিঙত শীৰ্ষ দহত থকা আনজন ভাৰতীয় বেটছমেন হৈছে ‘দ্যা ৱাল’ চেটেশ্বৰ পুজাৰা।
আনহাতে চেন্নাই টেষ্টত সুন্দৰ প্ৰদৰ্শনেৰে বলিং ৰেংকিঙত ইংলেণ্ডৰ তাৰকা ফাষ্টবলাৰ জেমছ এণ্ডাৰছনে ষষ্ঠ স্থানৰ পৰা তৃতীয় স্থানলে উত্থান ঘটিছে। অষ্ট্ৰেলিয়াৰ পেট কামিনছ আৰু ইংলেণ্ডৰ ষ্টুৱাৰ্ট ব্ৰডে প্ৰথম আৰু দ্বিতীয় স্থান অক্ষুণ্ণ ৰাখিছে।
টীম ইণ্ডিয়াৰ স্পীনাৰ ৰবীচন্দন অশ্বিন আৰু ফাষ্ট বলাৰ জশপ্ৰীত বুমৰাহে বলিং ৰেংকিঙৰ ক্ৰমে সপ্তম আৰু অষ্টম স্থান অক্ষুণ্ণ ৰাখিছে।
অলৰাউণ্ডাৰৰ তালিকাৰ শীৰ্ষ দহত টীম ইণ্ডিয়াৰ ৰবীন্দ্ৰ জাদেজাই দ্বিতীয়ৰ পৰা তৃতীয় স্থানলে অৱনমিত হোৱাৰ বিপৰীতে ৰবীচন্দন অশ্বীনে ষষ্ঠ স্থান অক্ষুণ্ণ ৰাখিছে। শীৰ্ষ স্থানত আছে ইংলেণ্ডৰ বেন ষ্ট’কছ।