ইংলেণ্ডৰ বিৰুদ্ধে ভাৰতৰ পৰাজয়ে উজ্জ্বীৱিত কৰিছে বাংলাদেশক

চলিত বিশ্বকাপৰ এখন মেচত আজি মুখামুখি হ’ব এছিয়াৰ দুই শক্তি ভাৰত আৰু বাংলাদেশ। বাৰ্মিংহামৰ এজবাষ্টন ষ্টেডিয়ামত হ’ব লগীয়া এই মেচখন দুয়োটা দলৰ বাবেই গুৰুত্বপূৰ্ণ হিচাপে বিবেচিত হৈছে। কিয়নো প্ৰতিযোগিতাৰ ছেমিফাইনেলত স্থান সুৰক্ষিত কৰিবলৈ হ’লে দুয়োটা দলকে প্ৰয়োজন বিজয়।

ক্ৰিকেটৰ সৰ্বোচ্চ প্ৰতিযোগিতাখনত ৩০ জুনত ভাৰতীয় দলৰ বিজয় ৰথ ৰুদ্ধ কৰিছিল ইংৰাজ বাহিনীয়ে। মেচখনত ৩১ ৰানত পৰাস্ত হোৱাত ভাৰতে ছেমি ফাইনেলত স্থান নিশ্চিত কৰিবৰ বাবে আজিৰ মেচলৈ অপেক্ষা কৰিব লগীয়া হয়।

এই পৰ্যন্ত ভাৰতে ৭ খন মেচৰ পৰা সংগ্ৰহ কৰিছে ১১ পইণ্ট। তালিকাত আছে দ্বিতীয় স্থানত। ভাৰতৰ এতিয়াও দুখন খেল বাকী আছে। যিকোনো এখন মেচত জয়ী হ’লেই ছেমি ফাইনেল খেলাটো নিশ্চিত হ’ব ভাৰতৰ।

ইফালে প্ৰতিযোগিতাখনত দুৰ্দান্ত প্ৰদৰ্শনেৰে ক্ৰিকেট বিশ্বক আঁচৰিত কৰি তোলা বাংলাদেশৰ বাবে সহজ হৈ থকা নাই ছেমি ফাইনেলৰ সমীকৰণ। সাতখন মেচত সাত পইণ্টেৰে তালিকাৰ ষষ্ঠ স্থানত থকা বাংলাদেশে ছেমি ফাইনেলত প্ৰৱেশ কৰিবলৈ হ’লে অনাগত দুয়োখন মেচত জয়ী হ’ব লাগিব। ইয়াৰ বাহিৰে নাই অন্য কোনো ৰাস্তা।

বাংলাদেশৰ সন্মুখত প্ৰত্যাহ্বান যথেষ্ট কঠিন যদিও দলটোৱে এনে প্ৰত্যাহ্বান হেলাৰঙে পাৰ হোৱাৰ উদাহৰণ দি থৈছে ২০০৭ চনত ৱেষ্ট ইণ্ডিজত অনুষ্ঠিত হোৱা ক্ৰিকেট বিশ্বকাপত। উক্ত বিশ্বকাপৰ গ্ৰুপৰ এখন মেচত পৰাস্ত কৰিছিল ভাৰতক। যাৰ বাবে শক্তিশালী বেটিং লাইন আপেৰে পৰিপুষ্ট ভাৰতীয় দলে বিশ্বকাপৰ প্ৰথম ৰাউণ্ডৰ পৰাই বিদায় লৈছিল।

এইবাৰৰ বিশ্বকাপতো বাংলাদেশৰ প্ৰদৰ্শন যথেষ্ট উন্নতমানৰ। বিশেষকৈ দলটোৰ ষ্টাৰ অলৰাউণ্ডাৰ চাকিব এল হাছানৰ প্ৰদৰ্শন উল্লেখনীয়। ক্ৰিকেটিং কেৰিয়াৰৰ সৰ্বোচ্চ ফৰ্মত থকা চাকিবে দুটা শতক আৰু তিনিটা অৰ্ধশতকেৰে বিশ্বকাপৰ এই পৰ্যন্ত ছয়খন মেচত সংগ্ৰহ কৰিছে ৪৭৬ ৰান। তদুপৰি আছে কেইবাটাও উইকেট।

বিশ্বকাপত ৩২ বছৰীয়া ষ্টাৰ অল ৰাউণ্ডাৰ গৰাকীৰ এনে প্ৰদৰ্শন আৰু আই পি এলৰ অভিজ্ঞতাই বাংলাদেশী দলটোৰ মনোবল যথেষ্ট পৰিমানে বৃদ্ধি কৰিছে। পৰৱৰ্তী দুয়োখন মেচেই দলটোৰ বাব মৰণপণ যুঁজ। আৰু সেয়ে দলটোৱে আজি ভাৰতক পৰাস্ত কৰিবলৈ উজাৰি দিব সৰ্বোচ্চ।

আনহাতে বিৰাট বাহিনীয়ে আগৰ মেচৰ কথা পাহৰি জয়ী হোৱাৰ লক্ষ্যৰে আজি খেলপথাৰত অৱতীৰ্ণ হ’ব বুলি সকলো ক্ৰিকেট প্ৰেমী দৃঢ় বিশ্বাসী।