বিৰোধীলৈ প্ৰশ্ন মমতা বেনাৰ্জীৰ, “যদি এজন গুজৰাটীয়ে সমগ্ৰ দেশলৈ যাব পাৰে, তেন্তে বঙালীয়ে কিয় নোৱাৰে”

“যদি এজন গুজৰাটীয়ে সমগ্ৰ দেশলৈ যাব পাৰে, তেন্তে বঙালীয়ে কিয় নোৱাৰে?”- মঙলবাৰে উত্তৰ গোৱাৰ আচোনোৰাত এক ৰেলী সম্বোধন কৰি পশ্চিম বংগৰ মুখ্যমন্ত্ৰী তথা তৃণমূল কংগ্ৰেছৰ অধ্যক্ষ মমতা বেনাৰ্জীয়ে এই মন্তব্য কৰিছে।

“মোক কোৱা হৈছে যে মই বঙালী। তেন্তে তেওঁ কি? তেওঁ এজন গুজৰাটী? আমি কৈছো নেকি যে তেওঁ এজন গুজৰাটী গতিকে তেওঁ ইয়ালৈ আহিব নোৱাৰে? এজন বঙালীয়ে ৰাষ্ট্ৰীয় সংগীত লিখিব পাৰে কিন্তু এজন বঙালী গোৱালৈ আহিব নোৱাৰে? আমি সকলোৱে গান্ধীজীক সন্মান কৰোঁ।আমি কেতিয়াবা প্ৰশ্ন কৰিছো নেকি যে গান্ধীজী এজন বাংলা নে গোৱানী বা উত্তৰ প্ৰদেশৰ? সেইজনহে প্ৰকৃতাৰ্থত দেশৰ নেতা, যি সকলোকে লগত লৈ যায়।” বেনাৰ্জীয়ে কয়।

উল্লেখ্য যে গোৱাৰ ৰাজনীতিত তৃণমূল কংগ্ৰেছৰ প্ৰৱেশক লৈ আন দলবোৰে প্ৰশ্ন উত্থাপন কৰিছিল। এই প্ৰসঙ্গতে মমতা বেনাৰ্জীয়ে এই মন্তব্য আগবঢ়াইছে।

গোৱাত তৃণমূলৰ নৱগঠিত ৰাজনৈতিক মিত্ৰজোঁট মহাৰাষ্ট্ৰবাদী গোমন্তক পাৰ্টিৰ সৈতে পানাজীত এক যুটীয়া ৰেলীত অংশ লৈ বেনাৰ্জীয়ে কয় যে গোৱাত তেওঁলোকৰ যুটীয়া পৰিয়াল হৈছে বিজেপিৰ প্ৰকৃত বিকল্প।

বিজেপিক পৰাজিত কৰিব বিচৰা ৰাজনৈতিক দলসমূহক ভোট বিভাজন নকৰি তৃণমূল মিত্ৰজোঁটৰ সৈতে যোগদান কৰিবলৈ অনুৰোধ জনায় বেনাৰ্জীয়ে।

বিজেপিৰ পৰা তেওঁক চৰিত্ৰৰ প্ৰমাণপত্ৰৰ প্ৰয়োজন নাই বুলি মন্তব্য কৰি বিজপি তথা নৰেন্দ্ৰ মোদীক কটাক্ষ কৰি বেনাৰ্জীয়ে কয়, “আমি কেৱল ভোটদানৰ সময় হ’লেহে পূজাৰ বাবে গঙ্গাৰ পাৰলৈ নাযাওঁ। যেতিয়া নিৰ্বাচনৰ সময় হয় মোদীয়ে গংগাত ডুব দিয়ে।”

নিজ ৰাজ্য পশ্চিমবংগত বিজেপিক ধৰাশায়ী কৰাৰ পিছত ৰাষ্ট্ৰীয় ৰাজনীতিৰ প্ৰেক্ষাপটত প্ৰৱেশ কৰিবলৈ চেষ্টা কৰা মমতা বেনাৰ্জীৰ তৃণমূল কিমান সফল হয় সেইয়া লক্ষণীয় হ’ব।