উচ্চতম ন্যায়ালয়ৰ গুৰুত্বপূৰ্ণ সিদ্ধান্ত: ২০২৬ চনৰ এছিয়ান গেমছৰ বাছনিত অংশ ল’ব পাৰিব ভিনেশ ফোগাটে

উচ্চতম ন্যায়ালয়ে ভাৰতৰ তাৰকা মল্লযুঁজাৰু ভিনেশ ফোগাটক ২০২৬ চনৰ এছিয়ান গেমছৰ বাছনি পৰীক্ষা বা ট্ৰায়েলত অংশগ্ৰহণ কৰাৰ বাবে অনুমতি প্ৰদান কৰিছে। ন্যায়ালয়ে নিজৰ নিৰ্দেশত কয় যে যদি আন কোনোবা খেলুৱৈ হ‘লহেঁতেন, তেন্তে কথাটো বেলেগ হ‘লহেঁতেন। ভিনেশে নিজৰ খেলৰ জৰিয়তে সমগ্ৰ দেশলৈ গৌৰৱ কঢ়িয়াই আনিছে। ইয়াৰ লগতে সৰ্বোচ্চ ন্যায়ালয়ে এই গোচৰটোত দিল্লী উচ্চ ন্যায়ালয়ে হস্তক্ষেপ কৰা পদ্ধতিক লৈ গভীৰ উদ্বেগ প্ৰকাশ কৰে। উচ্চতম ন্যায়ালয়ে কয় যে এনেধৰণৰ বিষয়বোৰত ন্যায়ালয়ে সহজে আৰু খৰতকীয়াকৈ হস্তক্ষেপ কৰাটো এক ডাঙৰ সমস্যা।

দৰাচলতে, ভিনেশ ফোগাটক ট্ৰায়েলত অংশগ্ৰহণৰ অনুমতি দিয়া দিল্লী উচ্চ ন্যায়ালয়ৰ সিদ্ধান্তক প্ৰত্যাহ্বান জনাই ভাৰতীয় মল্লযুঁজ ফেডাৰেচনে উচ্চতম ন্যায়ালয়ত এখন আৱেদন দাখিল কৰিছিল। এই আৱেদনৰ শুনানিৰ সময়তে সৰ্বোচ্চ ন্যায়ালয়ে ভিনেশ ফোগাটক উদ্দেশ্যি কয় যে আপুনি এগৰাকী অতিশয় সুদক্ষ আৰু উৎকৃষ্ট খেলুৱৈ। কিন্তু দেশৰ স্থান সকলোতকৈ ওপৰত, অৰ্থাৎ খেলুৱৈতকৈ দেশ সদায় প্ৰথম।

এই গোচৰৰ শুনানি গ্ৰহণ কৰি ন্যায়াধীশ পি এছ নৰসিমহাই স্পষ্ট কৰি দিয়ে যে এইটো কোনো মেডিকেল কলেজৰ নামভৰ্তিৰ প্ৰক্ৰিয়া নহয়, এইবোৰ ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ৰ খেলৰহে বিষয়। সেয়েহে ন্যায়ালয়ে এনেদৰে হস্তক্ষেপ কৰি খেলৰ সমগ্ৰ সময়সূচী বেয়া কৰিব নোৱাৰে বুলি তেওঁ গুৰুত্ব আৰোপ কৰে।