কাছাৰত ওলাল ভুৱা আৰক্ষী দল: আৰক্ষী বিষয়াৰ ভেশত বাহনৰ পৰা ধন সংগ্ৰহ

কাছাৰত ওলাইছে ভুৱা আৰক্ষী বিষয়াৰ এক দল। আৰক্ষীৰ ভেশত এই দলটোৱে পথেৰে গৈ থকা বাহনৰ পৰা ধন আদায় কৰাৰ গুৰুতৰ অভিযোগ উত্থাপন হৈছে।

এই ভুৱা আৰক্ষী গোটটোৰ মাষ্টাৰমাইণ্ডজনক শ্বাহিদ আহমেদ ওৰফে মইনা বুলি চিনাক্ত কৰা হৈছে। শ্বাহিদৰ নেতৃত্বতে দলটোৱে চলাই আহিছে এই অপকৰ্ম।

অভিযোগ অনুসৰি শ্বাহিদে ভুৱা আৰক্ষী দলটোৰ সৈতে নিশা বাহন ৰখাই কোনো বৈধতা নথকা সৰু সৰু যান বাহন আইন উলংঘাৰ বাবে জৰিমনা আদায় কৰি আহিছে।

লক্ষনীয়ভাৱে মাষ্টাৰমাইণ্ড শ্বাহিদৰ এখন এছ ইউ ভি- ও আছে আৰু এই বাহনখনক তেওঁ ‘অন-ডিউটি পুলিচ’ বাহন বুলি দেখুওৱাই পথত যানবাহনসমূহ বাধা দিয়ে।

প্ৰকাশিত খবৰ অনুসৰি, তেওঁৰ এই বাহনখনত সাধাৰণ লোকসকলক ভয় খুৱাবলৈ আৰক্ষীৰ চাইৰেনো সংযোগ কৰিছে।

সাধাৰণতে এই অবৈধ কাৰ্যকলাপৰ সময়ত তেওঁৰ লগত দুজন সহযোগী থাকে বুলি জানিব পৰা গৈছে। দলটোৰ এনে কাৰ্যৰ বলি হৈছে বহুকেইজন লোক।

যোৱা ১৮ নৱেম্বৰত এজন ব্যক্তিৰ বাহনৰ খিৰিকীত ক’লা গ্লাছ লগোৱাৰ বাবে ২০০০ টকা জৰিমনা বিহে আহমেদ আৰু তেওঁৰ দলটোৱে।

একেদৰে আন এজন ভুক্তভোগী অটোৰিক্সা চালকক ড্ৰাইভিং লাইচেন্স নথকাৰ বাবে জৰিমনা বিহে এই ভুৱা আৰক্ষীৰ দলটোৱে।

পাছত তেওঁলোকে ভুৱা আৰক্ষীৰ প্ৰতাৰণাৰ চিকাৰ হোৱা বুলি জানিব পাৰি ছ’চিয়েল মিডিয়া যোগে এই কু-চক্ৰটোৰ কাৰ্যকলাপৰ বিষয়ে প্ৰকাশ কৰে।

ছ’চিয়েল মিডিয়াত এই পোষ্টৰ পিছতে অভিযুক্ত শ্বাহিদ আহমেদ আৰু তেওঁৰ সহযোগীসকলৰ বিৰুদ্ধে কাছাৰ জিলাৰ বিভিন্ন থানাত গোচৰ ৰুজু কৰা হয়।

আৰক্ষী ৰূপী এই ভুৱা চক্ৰটোৰ বিৰুদ্ধে এতিয়া আৰক্ষীয়ে তদন্ত অব্যাহত ৰাখিছে বুলি সংবাদ মাধ্যমৰ আগত প্ৰকাশ কৰিছে।