টুৱেণ্টি-২০ত পৰিণত পিংক বল টে’ষ্ট মেচ; ৩০ অ’ভাৰত ১০৬ ৰানতে শেষ বাংলাদেশৰ প্ৰথম ইনিংছ

এখন টি-২০ মেচৰ দৰেই হৈ পৰিল আজি ৰাজনীতি আৰু ক্ৰিকেটৰ বহু মহা তাৰকাক সাক্ষী কৰি ভাৰতত অনুষ্ঠিত প্ৰথমখন দিবা-নৈশ টেষ্ট মেচ।

“পিংক বল টেষ্ট” আখ্যা পোৱা ভাৰত আৰু বাংলাদেশৰ মাজত অনুষ্ঠিত টেষ্টখনত প্ৰথমে বেট ধৰা বাংলাদেশে নিজৰ প্ৰথম ইনিংছ বেলাটোৰ ভিতৰতে মাত্ৰ ৩০ অ’ভাৰ খেলিয়ে সামৰিবলৈ বাধ্য হয় ভাৰতীয় ব’লাৰৰ সন্মুখত। দলটোৱে গোটাব পাৰে মাত্ৰ ১০৬ ৰান। ১১জনৰ মাত্ৰ ৩ জনহে দুটা অংকৰ ৰান কৰিবলৈ সক্ষম হয়।

ভাৰতীয় ক্ৰিকেট ইতিহাসত বিশেষ ৰূপে চিহ্নিত হোৱা কলকাতাৰ ইডেন গাৰ্ডেনৰ আজিৰ এই খেলখনৰ সূচনাৰ সাক্ষী হৈ ষ্টেডিয়ামত উপস্থিত আছিল বাংলাদেশৰ প্ৰধান মন্ত্ৰী শ্বেইখ হাছিনা, পশ্চিম বংগৰ মুখ্য মন্ত্ৰী মমতা বেনাৰ্জী, ভাৰতীয় ক্ৰিকেটৰ মহাতাৰকা শচীন টেণ্ডুলকাৰ, সুনীল গাভাস্কাৰ, ৰাহুল দ্ৰাবিড়কে ধৰি বহু খ্যাতিমান লোক।

ভাৰতীয় দল ব’লাৰ ইশান্ত শৰ্মাই বিধ্বংসী ব’লিঙেৰে মাত্ৰ ২২ ৰানৰ বিনিময়তে ৫টা উইকেট দখল কৰে। উমেশ যাদৱে ২৯ ৰানত ৩টা আৰু মহম্মদ ছামীয়ে ৩৬ ৰানত দুটা উইকেট পায়।

ভাৰতীয় দলে বেট ধৰি এই পৰ্য্যন্ত মায়ংক আগৰৱালৰ উইকেটটো হেৰুৱাই ২৮ ৰান সংগ্ৰহ কৰিছে।