অন্ধবিশ্বাসৰ কবলৰ পৰা সমাজক মুক্ত কৰিবলৈ বিশ্বনাথ আৰক্ষী প্ৰশাসনৰ জন জাগৰণ সভা

ৰাজ্যত অন্ধবিশ্বাসৰ ফলত বৃদ্ধি পাবলৈ ধৰা হত্যা-হিংসাৰ বাবে সমাজখন ক্ৰমাৎ এক জটিল দিশলৈ গতি কৰিবলৈ ধৰিছে। যাৰ বাবে শিক্ষাৰ প্ৰভাৱ পৰা অঞ্চলটো এতিয়া অন্ধবিশ্বাসে গ্ৰাস কৰিব ধৰিছে। একাংশ দুষ্ট প্ৰকৃতিৰ লোকৰ বাবে ডাইনীৰ নামত চলা হত্যা এতিয়া বহু অঞ্চলত এক জটিল সমস্যা হিচাপে গঢ় লৈ উঠিছে।

এই উদ্দেশ্যে ৰাইজ তথা জনসাধাৰণক একত্ৰিত কৰি সচেতনতা আৰু সজাগ কৰি তোলাৰ বাবে বিশ্বনাথ আৰক্ষী প্ৰশাসনৰ উদ্যোগত আৰু গাঁওৰক্ষী বাহিনীৰ সহযোগত বুধবাৰে বিশ্বনাথ চাৰিআলিৰ বিনাপানী নাট্য মন্দিৰত অনুষ্ঠিত হয় এখনি ‘জনজাগৰণ সভা’।

এই জনজাগৰণ সভাত বিশিষ্ট বক্তা হিচাপে উপস্থিত থাকে ৰাষ্ট্ৰীয় পৰ্যায়ৰ সামাজিক সংগঠন ‘ব্ৰাদাৰ্ছ’ৰ সচিব প্ৰধান তথা মানব অধিকাৰৰ সৈতে জড়িত সমাজ কৰ্মী দিব্যজ্যোতি শইকীয়া।

বিশিষ্ট ব্যক্তি হিচাপে উপস্থিত থকা শইকীয়াই সমাজত ব্যাপক হাৰত বৃদ্ধি পোৱা অন্ধবিশ্বাসৰ বাবে সমাজখন ভয়াৱহ দিশত আগবাঢ়িব ধৰিছে বুলি তাৎপৰ্যমূলক মন্তব্য কৰে। লগতে কোনো লোকে অন্ধবিশ্বাসৰ কবলত পৰি অপৰাধজনিত ঘটনা সংঘটিত কৰাৰ বাবে অগ্ৰসৰ হ’লে সেয়া কি দৰে ৰোধ কৰিব পৰা যায় সেই বিষয়েও আলোকপাত কৰে।

বিশ্বনাথ চাৰিআলিৰ বিশিষ্ট নাট্যকাৰ তৰুণ শইকীয়াৰ সভাপতিত্বত অনুষ্ঠিত হোৱা এই সভাত বিশ্বনাথৰ ভিন্ন প্ৰান্তৰ পৰা অহা গাঁওৰক্ষী বাহিনী,  গাঁওবুঢ়া সকলকে আদি কৰি বহুতো মহিলা কমিটি উপস্থিত থাকে।

এই সজাগতা সভাত বিশ্বনাথ জিলাৰ আৰক্ষী অধীক্ষক দিগন্ত কুমাৰ চৌধুৰী উপস্থিত থকাৰ লগতে বিশ্বনাথ জিলাৰ কেইবাখনো আৰক্ষী থানাৰ ভাৰপ্ৰাপ্ত আৰক্ষী বিষয়া আৰু অনান্য বহু সমাজ সচেতন ব্যক্তিৰ লগতে স্থানীয় দল-সংগঠনৰ নেতৃ বৃন্দ উপস্থিত থাকে।

আনহাতে বৰ্তমান আধুনিক যুগত ছ’চিয়েল মিডিয়াৰ জৰিয়তে বিভিন্ন উৰা বাতৰি প্ৰকাশ হৈ থাকে সেয়ে সেইবোৰৰ ওপৰত বিশ্বাস নকৰি কেনেকৈ জনসাধাৰণক সজাগ আৰু সচেতন কৰিব পাৰি তাৰ ওপৰতো কালিৰ সভাত বিস্তৃতৰূপত  আলোচনা কৰা হয়।