ইউ এছ অ’পেন টেনিছ প্ৰতিযোগিতাৰ ষ্টেডিয়ামক ৰূপান্তৰ কৰা হ’ল ৩৫০ খন বিচনাযুক্ত চিকিৎসালয়লৈ

আমেৰিকা যুক্তৰাষ্ট্ৰৰ নিউয়ৰ্কৰ বিলি জেন কিং ৰাষ্ট্ৰীয় টেনিছ চেণ্টাৰক ৩৫০ খন বিচনাযুক্ত অস্থায়ী চিকিৎসালয়লৈ ৰূপান্তৰ কৰা হৈছে বুলি ইউ এছ টেনিছ সংস্থাই জানিবলৈ দিয়ে।

নিউয়ৰ্ক বিলি জেন কিং ৰাষ্ট্ৰীয় টেনিছ চেণ্টাৰত ইউ এছ অ’পেন টেনিছ টুৰ্ণামেণ্ট অনুষ্ঠিত হৈ আহিছিল।

‘‘এয়া আমাৰ ঘৰ….আমি এই সময়ত সকলোৱে একেলগে আছো,’’ টেনিছ সংস্থাৰ এগৰাকী মুখপাত্ৰই কয়।

উল্লেখযোগ্য যে, আমেৰিকা যুক্তৰাষ্ট্ৰৰ কেবল মাত্ৰ নিউয়ৰ্ক চহৰতে ৬০,০০০-কৈ অধিক লোক ক’ৰ’না ভাইৰাছত আক্ৰান্ত হৈছে।

আনহাতে, আমেৰিকা যুক্তৰাষ্ট্ৰত বৰ্তমানলৈ ১,৭০,০০০-কৈ অধিক লোক মহামাৰী ক’ৰ’না ভাইৰাছত আক্ৰান্ত হৈছে।

ভাৰতত ১৪০০-কৈ অধিক লোক এই ভাইৰাছত আক্ৰান্ত হোৱাৰ লগতে ৪০ গৰাকী লোক এই ভাইৰাছৰ সংক্ৰমণৰ ফলত মৃত্যু হৈছে।

ক’ৰ’না ভাইৰাছৰ ভয়াবহ সংক্ৰমণৰ বাবে সমগ্ৰ বিশ্বত ক্ৰীড়া প্ৰতিযোগিতা সমূহ পিছুৱাই গৈছে অথবা বাতিল হৈছে।

জাপানৰ টকিঅ’ত অনুষ্ঠিত হ’বলগীয়া ২০২০ বৰ্ষৰ অলিম্পিক প্ৰতিযোগিতা ২০২১ বৰ্ষৰ জুলাই-আগষ্ট মাহলৈ পিছুৱাই দিয়া হৈছে।