ফাইনেলত শিৱকে ধৰি অসমৰ তিনিগৰাকী বক্সাৰ, অন্তিম দুইত অদমনীয় মেৰীকম

গুৱাহাটীৰ সৰুসজাই ক্ৰীড়া প্ৰকল্পৰ কৰ্মবীৰ নবীন চন্দ্ৰ বৰদলৈ ইনড’ৰ ষ্টেডিয়ামত চলি থকা দ্বিতীয় ইণ্ডিয়া অ’পেন আন্তঃৰাষ্ট্ৰীয় বক্সিং প্ৰতিযোগিতাৰ ফাইনেলত প্ৰৱেশ কৰিছে ছয়বাৰৰ বিশ্ব চেম্পিয়ন এম চি মেৰীকমৰ লগতে অসমৰ তাৰকা বক্সাৰ শিৱ থাপা, যমুনা বড়ো আৰু লাভলীনা বৰগোহাঁয়ে।

প্ৰতিযোগিতাৰ মহিলাৰ ৫১ কেজি শাখাৰ ছেমি ফাইনেলত মেৰীকমে সতীৰ্থ ভাৰতৰে নিখাত জাৰীনক ৪-১ ব্যৱধানত পৰাস্ত কৰি ফাইনেলত প্ৰৱেশ কৰে।

আনহাতে, শিৱ থাপাই পুৰুষৰ ৬০ কেজি শাখাত পোলেণ্ডৰ বক্সাৰ ডি ক্ৰিষ্টিয়ান চেজপানস্কীক দুৰ্দান্ত খেলেৰ কোনো ধৰণৰ সুযোগ নিদি ৫-০ ব্যৱধানত সহজে বিজয়ী হয়।

অসমৰ আন এগৰাকী বক্সাৰ যমুনা বড়োই ৫৪ কেজি শাখাত ভাৰতৰে এম মীনাকুমাৰীক ৫-০ ৰ একচেতীয়া ব্যৱধাত পৰাস্ত কৰি ফাইনেললৈ অগ্ৰসৰ হয় পদক নিশ্চিত কৰে।

উল্লেখযোগ্য যে, অসমৰ তাৰকা মহিলা বক্সাৰ লাভলীনা বৰগোহাঁয়ে বক্সিং ৰিঙত ননমাকৈয়ে ফাইনেলত উপনীত হৈছে।  লাভলীনাই ৬৯ কেজি শাখাৰ ছেমি ফাইনেলত ৱাক অভাৰ লাভ কৰে।

মেৰীকম, শিৱৰ উপৰিও ভাৰতৰ তাৰকা বক্সাৰ অমিত পাংঘাল (৫২ কেজি), কাবিন্দৰ সিং বিষ্ট (৫৬ কেজি), ৰোহিত টাকছ (৬৯ কেজি) আৰু বহুকেইগৰাকী বক্সাৰে ফাইনেলত স্থান সুৰক্ষিত কৰি পদক নিশ্চিত কৰিছে।