ইউক্ৰেইনৰ অঞ্চল দখলঃ ৰাষ্ট্ৰসংঘত ৰাছিয়াৰ বিৰুদ্ধে ভোট নিদিলে ভাৰতে

ৰাষ্ট্ৰসংঘৰ মজিয়াত আজি পুনৰ ৰাছিয়াৰ বিৰুদ্ধে ভোটদানৰ পৰা বিৰত থাকিল ভাৰত।

ৰাষ্ট্ৰসংঘৰ নিৰাপত্তা পৰিষদত ইউক্ৰেইনৰ অঞ্চল দখল কৰিবলৈ ৰাছিয়াই অনুষ্ঠিত কৰা গণভোটক গৰিহণা দি আমেৰিকা যুক্তৰাষ্ট্ৰ আৰু আলবেনিয়াই দাখিল কৰা এখন খচৰাৰ প্ৰস্তাৱত ভাৰতে ভোটদানৰ পৰা বিৰত থাকে। প্ৰস্তাৱটোৱে ৰাছিয়াই ইউক্ৰেইনৰ পৰা নিজৰ বাহিনী প্ৰত্যাহাৰ কৰিব লাগিব বুলি কোৱা হৈছিল।

নিৰাপত্তা পৰিষদৰ সদস্য ১৫ খন দেশে এই প্ৰস্তাৱকলৈ ভোট দান কৰিব লাগিছিল ৷ কিন্তু ৰাছিয়াই ইয়াৰ পূৰ্বে ভেটো ব্যৱহাৰ কৰে। ফলত প্ৰস্তাৱটো গৃহীত কৰিব পৰা নগ’ল। দহখন দেশে প্ৰস্তাৱৰ সমৰ্থনত ভোট দিছিল আৰু চাৰিখন দেশ ভোটদানৰ পৰা বিৰত আছিল।

ৰাষ্ট্ৰসংঘৰ মহাসচিব এণ্টনিঅ’ গুটেৰেছে কয় যে , ভাবুকি বা বল প্ৰয়োগৰ দ্বাৰা আন এখন দেশৰ ভূখণ্ড দখল কৰাটো আন্তঃৰাষ্ট্ৰীয় আইনৰ নীতিৰ উলংঘন। উল্লেখ্য পুটিনে গ্ৰেণ্ড ক্ৰেমলিন পেলেছৰ ছেইণ্ট জৰ্জ হলত এক টেলিভিছন অনুষ্ঠানত পূব ডনেটস্ক আৰু লুহানস্ক অঞ্চলৰ লগতে দক্ষিণ জাপোৰিজজিয়া আৰু খেৰচন অঞ্চলৰ সংযুক্ত কৰে।

অধিকৃত ইউক্ৰেইনৰ অঞ্চলসমূহত ৰাছিয়াই চাৰিটা ‘গণভোট’ত জয়ী হোৱাৰ দাবী কৰিছিল, যি জয় মস্কোৱে অধিক ভূ-খণ্ড নিজৰ অধিগ্ৰহণ কৰাৰ ভিত্তি হিচাপে ব্যৱহাৰ কৰিব পাৰে। আমেৰিকাই ৰাছিয়াৰ এনে পদক্ষেপক হঠকাৰী আখ্যা দিয়াৰ লগতে এনে কাৰ্যৰ পৰা আঁতৰি থাকিবলৈ সকিয়াই দিছে।