এছিয়ান গেমছত ভাৰতৰ প্ৰথমটো স্বৰ্ণ, সোমবাৰে শ্বুটিঙত বিশ্ব অভিলেখ গঢ়ি চেম্পিয়ন ৩ ভাৰতীয়

চলিত এছিয়ান গেমছৰ প্ৰথমটো সোণৰ পদক আহিল ভাৰতলৈ। শ্বুটিঙত দিৱ্যাংশ পানোৱাৰ, ঐশ্বৰ্য তোমৰ, ৰুদ্ৰাংশ পাটিলে দেশলৈ সোণ কঢ়িয়াই আনিছে। তেওঁলোকে দলীয় শাখাত বিশ্ব অভিলেখ গঢ়ি সোণৰ পদক লাভ কৰে।

১০ মিটাৰ এয়াৰ ৰাইফল শাখাত ভাৰতে এই পদক লাভ কৰে। দিব্যাংশ, ঐশ্বৰ্য আৰু ৰুদ্ৰাংশৰ ভাৰতীয় দলটোৱে মুঠ ১৮৯৩.৭ পইণ্ট স্কোৰ কৰে। এয়া বিশ্ব অভিলেখ। ইয়াৰ পূৰ্বৰ অভিলেখ চীনৰ হাতত আছিল। তেওঁলোকে ১৮৯৩.৩ পইণ্ট স্কোৰ কৰিছিল। কোৰিয়াই ১৮৯০.১ স্কোৰ কৰি ৰূপৰ পদক লাভ কৰে। চীনে ব্ৰঞ্জৰ পদক লাভ কৰে। তেওঁলোকৰ স্কোৰ হৈছে ১৮৮৮.২।

লগতে পঢ়ক: India vs Australia, 2nd ODI: শ্ৰেয়াস-শুভমনৰ শতক, অশ্বিনৰ ৩ উইকেট; এখন মেচ বাকী থকা অৱস্থাতে ভাৰতৰ শৃংখলা জয়

সোমবাৰে নৌকা চালনাতো (ৰোয়িং) ভাৰতে দুটা ব্ৰঞ্জৰ পদক লাভ কৰে। ‘মেনছ ফ’ৰ’ শাখাত যশৱিন্দৰ, ভীম, পুনিট আৰু আশীষে ব্ৰঞ্জৰ পদক লাভ কৰে। তেওঁলোকে ৬:১০:৮১ মিনিট সময় লয়। উজবেকিস্তানে এই শাখাত সোণৰ পদক লাভ কৰে। তেওঁলোকৰ সময় আছিল ৬:০৪:৯৬। চীনে পাইছে ৰূপ। তেওঁলোকৰ সময় ৬:১০:০৪।

ভাৰতৰ হৈ ‘কোৱাড্ৰপল স্কালছ’ শাখাত সতনম সিং, পৰমিন্দৰ সিং, জাকাৰ খান আৰু সুখমীত সিঙে ব্ৰঞ্জৰ পদক লাভ কৰে।

লগতে পঢ়ক: গাড়ীৰ হেডলাইটক লৈ কাজিয়াৰ সূত্ৰপাত; আৰক্ষীৰ প্ৰচণ্ড চৰত মৃত্যু ব্যক্তিৰ

ইয়াকে লৈ মুঠ আঠটা পদক লাভ কৰিছে ভাৰতে। ভাৰতে লাভ কৰে এটা সোণ, তিনিটা ৰূপ আৰু চাৰিটা ব্ৰঞ্জ। এই প্ৰতিবেদন লিখাৰ সময়লৈকে পদকৰ সংখ্যাত ছয় নম্বৰত আছে ভাৰত। শীৰ্ষত চীন। তেওঁলোকে পাইছে ২৫টা সোণ, ১১টা ৰূপ আৰু ৫টা ব্ৰঞ্জ। ইয়াৰ পিছতে আছে ক্ৰমে দক্ষিণ কোৰিয়া, জাপান, উজবেকিস্তান আৰু হংকং।