“অবৈধ প্ৰব্ৰজনৰ আন্তঃৰাষ্ট্ৰীয় কেন্দ্ৰ হ’ব নোৱাৰে ভাৰত” : ৰহিঙীয়া সম্পৰ্কত কেন্দ্ৰ চৰকাৰ
কেন্দ্ৰীয় চৰকাৰে উচ্চতম ন্যায়ালয়ক শুকুৰবাৰে কয় যে ভাৰত ‘অবৈধ প্ৰব্ৰজনকাৰীৰ আন্তঃৰাষ্ট্ৰীয় কেন্দ্ৰ’ হ’ব নোৱাৰে।
জম্মুলৈ ম্যানমাৰৰ পৰা প্ৰব্ৰজন কৰা ১৫০জন ৰহিঙীয়াক ভাৰত চৰকাৰে আৱদ্ধ কৰি ৰাখিছে।
তেওঁলোকক মুক্তি দি ৰক্ষণাবেক্ষণ দিয়াৰ বাবে কৰা আবেদনৰ ভিত্তিত কেন্দ্ৰই এইদৰে কয়।
কেন্দ্ৰই কয় যে ৰহিঙীয়াসকল সম্পূৰ্ণভাৱে অবৈধ প্ৰব্ৰজনকাৰী, যি ৰাষ্ট্ৰীয় সুৰক্ষাৰ বাবে গভীৰ ভাবুকি হৈ পৰিছে।
উল্লেখযোগ্য যে ৬ মাৰ্চৰ দিনা জম্মু আৰু কাশ্মীৰৰ প্ৰশাসনে কোনে নথিপত্ৰ নোহোৱা প্ৰব্ৰজনকাৰীসকলক চিনাক্তকৰণৰ প্ৰক্ৰিয়া আৰম্ভ কৰিছিল।
১৫০জনতকৈও অধিক প্ৰব্ৰজনকাৰীক বিদেশী আইনৰ অধীনত আৱদ্ধ কৰি ৰখা হৈছে।
২০১৭ চনৰ পৰা হাজাৰৰো অধিক ৰহিঙীয়াই ম্যানমাৰৰ পৰা ভাৰতত প্ৰৱেশ কৰি বাস কৰি আছে।
ইয়াৰ কাৰণ হ’ল ম্যানমাৰত হোৱা উচ্ছেদ।
ৰাষ্ট্ৰসংঘই এই সম্পৰ্কে কৈছে যে ম্যানমাৰৰ সেনাই ৰহিঙীয়াসকলৰ বিৰুদ্ধে জাতিগতভাৱে নিৰ্মূল অভিযান কৰিছে।
ভাৰত চৰকাৰে কয় যে সংবিধানৰ ২১ নম্বৰ অনুচ্ছেদত থকা জীৱন আৰু স্বতন্ত্ৰতাৰ অধিকাৰৰ ভিত্তিত কোনো অবৈধ প্ৰব্ৰজনকাৰীয়ে ভাৰতত বসবাস কৰিব নোৱাৰিব।