কেন্দ্ৰীয় গৃহ মন্ত্ৰালয়ৰ দ্বাৰা ২০০৯ চনৰ নাগৰিকত্ব বিধি সংশোধন: বিদেশী আৱেদনকাৰীৰ ওপৰত পাছপ’ৰ্ট জমা দিয়াৰ চৰ্ত আৰোপ
বাংলাদেশ, পাকিস্তান আৰু আফগানিস্তানৰ পৰা আহি ভাৰতীয় নাগৰিকত্ব লাভ কৰিব বিচৰা লোকসকলৰ বাবে কেন্দ্ৰীয় চৰকাৰে এক গুৰুত্বপূৰ্ণ নিৰ্দেশনা জাৰি কৰিছে। শেহতীয়াকৈ কেন্দ্ৰীয় গৃহ মন্ত্ৰালয়ে ২০০৯ চনৰ নাগৰিকত্ব বিধি সংশোধন কৰি এক জাননী প্ৰকাশ কৰিছে, ইয়াৰ জৰিয়তে উক্ত তিনিখন দেশৰ আৱেদনকাৰীসকলে নিজৰ দেশৰ পাছপ’ৰ্টৰ বৰ্তমানৰ অৱস্থা সন্দৰ্ভত এক আনুষ্ঠানিক ঘোষণাপত্ৰ দাখিল কৰাটো বাধ্যতামূলক কৰা হৈছে।
গৃহ মন্ত্ৰালয়ে জাৰি কৰা এই জাননী অনুসৰি, ভাৰতৰ নাগৰিক হ’ব বিচৰা কোনো বাংলাদেশী, পাকিস্তানী বা আফগান নাগৰিকৰ হাতত নিজৰ দেশৰ কোনো বৈধ বা ম্যাদ উকলি যোৱা পাছপ’ৰ্ট থাকিলে তাৰ সবিশেষ তথ্য প্ৰদান কৰিব লাগিব। যদি আৱেদনকাৰীৰ হাতত বৈধ পাছপ’ৰ্ট থাকে, তেন্তে তেওঁ সেই পাছপ’ৰ্টৰ নম্বৰ, জাৰি কৰা তাৰিখ আৰু ইয়াৰ ম্যাদৰ সবিশেষ তথ্য কেন্দ্ৰক অৱগত কৰিব লাগিব। ইয়াৰ লগতে আৱেদনকাৰীয়ে লিখিত ৰূপত এই ঘোষণাও কৰিব লাগিব যে ভাৰতীয় নাগৰিকত্ব লাভ কৰাৰ পোন্ধৰ দিনৰ ভিতৰত তেওঁ নিজৰ হাতত থকা বৈধ বা ম্যাদ উকলি যোৱা পাছপ’ৰ্টটো ডাক বিভাগৰ সংশ্লিষ্ট জ্যেষ্ঠ অধীক্ষক বা অধীক্ষকৰ কাৰ্যালয়ত জমা দিব।
কেন্দ্ৰীয় চৰকাৰে ২০০৯ চনৰ নাগৰিকত্ব বিধি সংশোধন কৰি তাত এক নতুন অনুচ্ছেদ সংযোজন কৰিছে। এই অনুচ্ছেদটো বিধি ‘১চি’ (1C) অনুসূচীৰ পিছত যোগ কৰা হ’ব বুলি জানিব পৰা গৈছে। উল্লেখ্য যে, এই ‘১চি’ অনুসূচীখন বাংলাদেশ, পাকিস্তান আৰু আফগানিস্তানৰ পৰা অহা হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টান ধৰ্মাৱলম্বী লোকসকলৰ ভাৰতীয় নাগৰিকত্বৰ আৱেদনৰ ক্ষেত্ৰত প্ৰযোজ্য। ইয়াৰ পূৰ্বে ২০১৯ চনত কেন্দ্ৰীয় চৰকাৰে নাগৰিকত্ব সংশোধনী আইন (CAA) বলৱৎ কৰিছিল, যাৰ জৰিয়তে ২০১৪ চনৰ ৩১ ডিচেম্বৰৰ পূৰ্বে উক্ত তিনিখন ৰাষ্ট্ৰৰ পৰা ভাৰতলৈ অহা নথি-পত্ৰবিহীন প্ৰব্ৰজনকাৰীসকলৰ বাবে ভাৰতীয় নাগৰিকত্ব লাভৰ পথ সুচল কৰা হৈছিল।