নৱবৰ্ষৰ পূৰ্বে দেশজুৰি গিগ কৰ্মীৰ ধৰ্মঘট: খাদ্য আৰু অত্যাৱশ্যকীয় সামগ্ৰীৰ যোগান ব্যাহত

নৱবৰ্ষৰ প্ৰাকক্ষণত দেশজুৰি গিগ কৰ্মীসকলে ধৰ্মঘট কাৰ্যসূচী ৰূপায়ণ কৰাৰ ফলত মহানগৰীসমূহৰ খাদ্য আৰু অত্যাৱশ্যকীয় সামগ্ৰীৰ যোগান সেৱাত গুৰুতৰ ব্যাঘাত ঘটিছে। চুইগি (Swiggy), জোমাটো (Zomato), ব্লিংকিট (Blinkit), জেপ্টো (Zepto), আমাজন (Amazon) আৰু ফ্লিপকাৰ্ট (Flipkart)-ৰ দৰে প্ৰতিষ্ঠানৰ সৈতে জড়িত ডেলিভাৰী কৰ্মীসকলে মজুৰি হ্ৰাস, কঠিন কৰ্ম পৰিস্থিতি আৰু অসুৰক্ষিত নীতি-নিৰ্দেশনাৰ বিৰুদ্ধে এই প্ৰতিবাদত নামি পৰিছে।

প্ৰকাশিত তথ্য অনুসৰি, বৰদিনৰ দিনটোত হোৱা অনুৰূপ প্ৰতিবাদৰ পৰিপ্ৰেক্ষিতত এই ধৰ্মঘট আৰম্ভ হয়; যাৰ ফলত বহু ঠাইত প্ৰায় ৫০–৬০ শতাংশ সেৱা ব্যাহত হৈছে। ‘তেলেংগানা গিগ এণ্ড প্লেটফৰ্ম ৱৰ্কার্ছ ইউনিয়ন‘ (TGPWU) আৰু ‘ইণ্ডিয়ান ফেডাৰেচন অৱ এপ-ভিত্তিক পৰিবহণ শ্ৰমিক‘ (IFAT) আদি সংগঠনে এই আন্দোলনত নেতৃত্ব বহন কৰিছে। এই ধৰ্মঘটৰ প্ৰভাৱ দিল্লী, মুম্বাই, বেংগালুৰু, হায়দৰাবাদ, পুনে আৰু কলকাতাৰ দৰে মেট্ৰ’ চহৰৰ লগতে আন কেইবাখনো চহৰতো পৰিছে।

গিগ কৰ্মীসকলৰ প্ৰধান দাবীসমূহ হ’ল:

জীৱন বিপদত পেলোৱা ‘১০ মিনিট ডেলিভাৰী’ মডেল বন্ধ কৰা।

এলগৰিদমভিত্তিক জৰিমনা বা কৰ্তন নোহোৱা এক স্বচ্ছ আৰু ন্যায্য মজুৰি ব্যৱস্থা প্ৰৱৰ্তন কৰা।

চাকৰিৰ নিৰাপত্তা, স্বাস্থ্য বীমা, দুৰ্ঘটনাজনিত বীমা আৰু পেঞ্চনৰ সুবিধা প্ৰদান কৰা।

দীঘলীয়া আৰু অসুৰক্ষিত কৰ্ম-সময় (Shift)ৰ পৰা সুৰক্ষা নিশ্চিত কৰা।