নিৰ্বাচন ‘পাছ আউট’, কৰ’ণাৰ নতুন ‘এডমিছন’: দেশত একেদিনাই ক’ভিদত মৃত্যু ১০৪ জনৰ

বৃহস্পতিবাৰে পাঁচ ৰাজ্যৰ নিৰ্বাচনী ফলাফল ঘোষণা কৰাৰ পাছতে দেশত সামৰণি পৰিল নিৰ্বাচনী মহোৎসৱৰ। নিৰ্বাচনৰ ধামখুমীয়াত চেপেটা লগা কৰ’ণাই এই সুযোগতে এঙামূৰি দি গা টঙাই উঠিছে।

আশংকা কৰাৰ দৰেই নিৰ্বাচনৰ ভিৰৰ মাজত হেৰাই যোৱা কৰ’ণাই পুনৰ ভূমুকি মাৰিছে দেশত। পূৰ্বেই ঘোষিত সময়সূচী অনুসৰি ২২ জুনত আহিবলগীয়া ক’ভিদৰ চতুৰ্থ লহৰ আগতীয়াকৈ অহাৰ সম্ভাৱনাই প্ৰকট হৈ পৰিছে।

বৃহস্পতিবাৰে ভাৰতত ৪,১৮৪ জন কৰ’ণা সংক্ৰমিত ৰোগী ধৰা পৰিছে। ইয়াৰ ফলত দেশত ক’ভিদ সংক্ৰমণৰ মুঠ সংখ্যা ৪,২৯,৮০,০৬৭ লৈ বৃদ্ধি পাইছে।

স্বাস্থ্য আৰু পৰিয়াল কল্যাণ মন্ত্ৰালয়ে সদৰি কৰা তথ্য দেশত যোৱা ২৪ ঘণ্টাত ১০৪ জন ক’ভিদত আক্ৰান্ত ৰোগীৰ মৃত্যু হৈছে। এনেদৰে ভাৰতত ক’ভিদত মৃত্যু হোৱা ৰোগীৰ সংখ্যা ৫,১৫,৪৫৯ জনলৈ বৃদ্ধি পাইছে।

মন্ত্ৰালয়ৰ তথ্য অনুসৰি দেশত সক্ৰিয় ক’ভিদ ৰোগীৰ সংখ্যা বৰ্তমান ৪৪,৪৮৮ জন।

আনহাতে যোৱা ২৪ ঘণ্টাত ৬,৫৫৪ জন ৰোগী ক’ভিদৰ পৰা মুক্ত হৈছে। ক’ভিদৰ পৰা সুস্থ হৈ উঠা ৰোগীৰ সংখ্যাৰ হাৰ ৯৮.৭০ শতাংশ।

এনেদৰে দেশত মুঠ পুনৰ সুস্থতাৰ সংখ্যা ৪,২৪,২০,১২০ ত উপনীত হৈছে।