শৰীৰবোৰ চলি আছে, মনবোৰ ডুবি গৈছে”: ভাৰতৰ মানসিক স্বাস্থ্যৰ সংকটক লৈ উদ্বেগ প্ৰকাশ ষ্টাৰ্টআপ প্ৰতিষ্ঠাপকৰ

ভাৰতৰ দ্ৰুত অৰ্থনৈতিক বিকাশৰ বিপৰীতে সমাজত ক্ৰমান্বয়ে বৃদ্ধি পোৱা মানসিক স্বাস্থ্যৰ সংকট আৰু আৱেগিক বিচ্ছিন্নতাক লৈ গভীৰ উদ্বেগ প্ৰকাশ কৰিছে জনপ্ৰিয় ষ্টাৰ্টআপ ‘এম বি এ ছাহৱালা‘ৰ প্ৰতিষ্ঠাপক প্ৰফুল্ল বিলোৰে। শেহতীয়াকৈ সামাজিক মাধ্যম ‘এক্স‘ (পূৰ্বৰ টুইটাৰ) যোগে বিলোৰে উল্লেখ কৰে যে দেশৰ সাধাৰণ জনতা বৰ্তমান এক “নীৰৱ যন্ত্ৰণা”ৰ মাজেৰে পাৰ হৈছে, য‘ত মানুহ শাৰীৰিকভাৱে উপস্থিত থাকিলেও মানসিকভাৱে সম্পূৰ্ণ অনুপস্থিত।

নিজৰ ব্যৱসায়িক ভ্ৰমণৰ অভিজ্ঞতা বৰ্ণনা কৰি বিলোৰে কয় যে তেওঁ সমগ্ৰ ভাৰতবৰ্ষ ভ্ৰমণ কৰি ধনী, দৰিদ্ৰ, যুৱক আৰু মধ্যবয়স্ককে ধৰি শ শ লোকক লগ পাইছে। তেওঁৰ মতে, এই মানুহবোৰৰ মাজত আটাইতকৈ সাধাৰণ কথাটো কোনো উচ্চাকাংক্ষা বা দৰিদ্ৰতা নহয়, বৰঞ্চ ই হৈছে এক গভীৰ মানসিক কষ্ট। প্ৰতিষ্ঠাপকগৰাকীয়ে আঙুলিয়াই দিয়ে যে বৰ্তমান সময়ত বৈবাহিক সম্পৰ্কসমূহ ভাঙি পৰিছে, সম্পৰ্কবোৰ কাৰাগাৰ যেন অনুভৱ হৈছে আৰু মানুহে নিজৰ কৰ্মক্ষেত্ৰত কোনো প্ৰেৰণা বিচাৰি পোৱা নাই। ইয়াৰ লগতে অন্তহীন ঋণ, ব্যৱসায়িক স্থবিৰতা আৰু অৰ্থনৈতিক চাপে মানুহক হতাশাগ্ৰস্ত কৰি তুলিছে।

সমস্যাৰ মূল কাৰণ হিচাপে তেওঁ সমাজৰ ক্ৰমবৰ্ধমান আৱেগিক বিচ্ছিন্নতাক জগৰীয়া কৰে। বিলোৰে তেওঁৰ পোষ্টটোত লিখিছে যে বৰ্তমান মানুহৰ কেৰিয়াৰ আগবাঢ়িব পৰা নাই, শৰীৰবোৰ যান্ত্ৰিকভাৱে চলি আছে যদিও মনবোৰ যেন ডুবি গৈছে। তেওঁ উল্লেখ কৰে যে মেদবহুলতা, মানসিক চাপ, উদ্বেগ আৰু নিৰাশাৰ দৰে সমস্যাবোৰ সকলোৱে অনুভৱ কৰিছে যদিও কোনেও এই বিষয়ে মুকলিকৈ আলোচনা নকৰে। পৰিয়ালৰ সৈতে একেটা কোঠাতে বহি থকাৰ পিছতো মানুহ মানসিকভাৱে আন কৰবাত হেৰাই থকা বুলি তেওঁ আক্ষেপ প্ৰকাশ কৰে। তেওঁৰ মতে, প্ৰকৃত সংকট দেশৰ অৰ্থনীতিত নহয়, বৰঞ্চ ই প্ৰতিদিনে মানুহৰ মনৰ ভিতৰত নীৰৱে আৰু গভীৰভাৱে ঘটি আছে।

প্ৰফুল্ল বিলোৰৰ এই বাৰ্তাই সামাজিক মাধ্যমত ব্যাপক চৰ্চা লাভ কৰিছে। তেইশ হাজাৰৰো অধিক দৰ্শকে চোৱা এই পোষ্টটোৰ মন্তব্য শিতানত বহুতো ব্যৱহাৰকাৰীয়ে তেওঁৰ সৈতে একমত প্ৰকাশ কৰিছে। একাংশ লোকে প্ৰতিক্ৰিয়া ব্যক্ত কৰি কয় যে মানুহে মানসিক কষ্টক ইমানেই স্বাভাৱিক বুলি মানি লৈছে যে মানসিক শান্তি এতিয়া এক বিলাসিতাত পৰিণত হৈছে। আন এজন ব্যৱহাৰকাৰীয়ে মন্তব্য কৰে যে বৰ্তমান সমাজত মানুহে ইজনে সিজনৰ কাষত থকাৰ সলনি কেৱল শাৰীৰিক নৈকট্যটোহে বজাই ৰাখিছে, যিটো পৰিস্থিতিক এক শতাংশ বেটাৰীৰে জীৱন চলোৱাৰ সমকক্ষ বুলি অভিহিত কৰা হৈছে। এই সামগ্ৰিক প্ৰতিক্ৰিয়াই পুনৰবাৰ দেশত মানসিক স্বাস্থ্যৰ সজাগতা আৰু অৰ্থপূৰ্ণ পাৰস্পৰিক সম্পৰ্ক গঢ়ি তোলাৰ প্ৰয়োজনীয়তাৰ বিষয়টোক চৰ্চালৈ আনিছে।