মাহে ১৫ লাখ টকাৰ ঘৰভাড়া দি থকা কূটনীতিবিদক অষ্ট্ৰিয়াৰ পৰা ঘূৰাই আনিলে ভাৰতে

মাহে ১৫ লাখ টকাৰ ঘৰভাড়া দি থকা এগৰাকী কূটনীতিবিদক ভাৰতে অষ্ট্ৰিয়াৰ পৰা ঘূৰাই আনিছে,  লাইভ মিণ্টত প্ৰকাশিত এটা বাতৰিত এই কথা কোৱা হৈছে।

ৰেণু পাল নামৰ কুটনীতিবিদগৰাকীৰ বিৰুদ্ধে পুঁজিৰ অপব্যৱহাৰকে ধৰি অন্যান্য বিত্তীয় খেলিমেলিৰ অভিযোগো আছে। পাল ১৯৮৮ বেচ্চৰ ভাৰতীয় বৈদেশিক সেৱাৰ বিষয়া আৰু ইউৰোপৰ দেশখনত তেওঁৰ কাৰ্য্যকাল অহা মাহত অন্ত পৰিব লগীয়া আছিল।

বিষয়াগৰাকীৰ বিৰুদ্ধে চেণ্ট্ৰেল ভিজিলেন্স কমিশ্যনৰ দ্বাৰা নিৰ্দেশিত এটা তদন্তত বৈদেশিক পৰিক্ৰমা মন্ত্ৰ্যালয়ে কয় যে তেওঁ মন্ত্ৰ্যালয়ৰ অনুমতি অবিহনেই চৰকাৰী বাসভৱনটোত কোটি কোটি টকাৰ খৰচৰ দায়িত্ব লৈছিল।

চৰকাৰী সূত্ৰসমূহে কয়, কূটনীতিবিদগৰাকীয়ে ঠগবাজিৰে VAT ৰিফাণ্ড দাবী কৰি আহিছে আৰু চৰকাৰৰ দ্বাৰা অনুমোদিত বিভিন্ন অনুমোদনৰ ক্ষেত্ৰত মিছা তথ্য উপস্থাপন কৰি আহিছে।

মন্ত্ৰ্যালয়ৰ মুখ্য তদন্তকাৰী বিষয়াৰ দ্বাৰা নেতৃত্বাধীন এটা দলে যোৱা ছেপ্টেম্বৰত ভিয়েনালৈ গৈ তদন্তটো সম্পন্ন কৰিছিল। তদন্তকাৰী দলটোৱে দাখিল কৰা প্ৰতিবেদনত বিষয়াগৰাকীৰ বিত্তীয় খেলিমেলি আৰু আচৰণবিধি ভংগৰ বিষয়ে স্পষ্টকৈ নিশ্চিত কৰা হয়।

তাৰ পিছতে মন্ত্ৰ্যালয়টোৱে ৯ ডিচেম্বৰত ৰেণুক মুখ্য কাৰ্য্যালয়লৈ স্থানান্তৰ কৰে। তেওঁক যিকোনো ধৰণৰ প্ৰশাসনিক কামকাজ বা বিত্তীয় ক্ষমতা প্ৰয়োগ কৰাৰ পৰা বাধা দিয়া হৈছে। ২৯ ডিচেম্বৰত তেওঁ ভাৰতলৈ ঘূৰি আহে।