দেশত হ্ৰাস পালে দৈনিক সংক্ৰমণৰ লগতে সক্ৰিয় ৰোগীৰ সংখ্যা; কেৰেলাৰ পৰিস্থিতি উদ্বেগজনক

দেশত কৰ’নাৰ তৃতীয় ঢৌৰ প্ৰবল আশংকাৰ চৰ্চা চলি থকাৰ মাজতে যোৱা ২৪ ঘন্টাত দৈনিক সংক্ৰমণৰ হাৰ একেবাৰতে বহুখিনি হ্ৰাস পোৱাৰ লগতে সক্ৰিয় ৰোগীৰ সংখ্যাও হ্ৰাস পাইছে।

কিন্তু দেশৰ এখন ৰাজ্য কেৰেলাত কৰ’নাৰ সংক্ৰমণে উদ্বেগজনক পৰিস্থিতিৰ সৃষ্টি কৰিছে।

দেওবাৰে কেন্দ্ৰীয় স্বাস্থ্য মন্ত্ৰ্যালয়ে প্ৰকাশ কৰা তথ্য অনুসৰি যোৱা ২৪ ঘণ্টাত দেশত মুঠ ক’ৰ’নাত আক্ৰান্ত হৈছে ২৮হাজাৰ ৫৯১ জন লোক। শনিবাৰে  দেশত মুঠ ক’ৰ’নাত আক্ৰান্ত হৈছিল ৩৩হাজাৰ ৩৭৬ জন লোক।

ইয়াৰ ভিতৰত যোৱা ২৪ ঘন্টাত অকল কেৰেলাতেই ২০হাজাৰতকৈয়ো অধিক লোক আক্ৰান্ত হৈছে।

দেশত এতিয়া মুঠ কৰ’না আক্ৰান্ত লোকৰ সংখ্যা হৈছেগৈ ৩কোটি ৩২লাখ ৩৬হাজাৰ ৯২১জন।

আনহাতে, যোৱা ২৪ ঘণ্টাত দেশত ৩৩৮ জন কোভিড আক্ৰান্ত লোকৰ মৃত্যু হৈছে। দেশত এতিয়ালৈকে মুঠ কৰ’নাত মৃত্যুৰ সংখ্যা হৈছে ৪লাখ ৪২হাজাৰ ৬৫৫জন।

যোৱা ২৪ ঘন্টাত সুস্থ হৈ ঘৰলৈ ওভতা ৰোগীৰ সংখ্যা হৈছে ৩৪ হাজাৰ ৮৪৮জন। দেশত এতিয়ালৈকে মুঠ ৩কোটি ২৪ লাখ ৯হাজাৰ ৩৪৫জন লোক কৰ’নাৰ পৰা সুস্থ হৈ উঠিছে।

স্বাস্থ্য মন্ত্ৰ্যালয়ৰ তথ্য অনুসৰি দেশত বৰ্তমান সক্ৰিয় ৰোগীৰ সংখ্যা হৈছে ৩লাখ ৮৪হাজাৰ ৯২১জন।

ইপিনে, দেশত এতিয়ালৈকে ৭৩কোটি ৮২ লাখ ৭হাজাৰ ৩৭৮ জন লোকক কৰ’নাৰ ভেকচিন প্ৰদান কৰা হৈছে। ইয়াৰ ভিতৰত যোৱা ২৪ ঘন্টাত ৭২লাখ ৮৬হাজাৰ ৮৮৩জনক ভেকচিন দিয়া হৈছে।

আইচিএমআৰৰ তথ্য অনুসৰি, যোৱা ২৪ ঘন্টাত দেশত ১৫ লাখ ৩০হাজাৰ ১২৫টা নমুনা পৰীক্ষা কৰা হৈছে।

দেশত কৰ’নাৰ তৃতীয়টো ঢৌ আৰু ভাইৰাছৰ নতুন ভেৰিয়েন্টৰ সংক্ৰমণৰ আতংকই উদ্বিগ্নতা বৃদ্ধি কৰি ৰখাৰ মাজতে কৰ’না পৰিস্থিতি কোনো কাৰণতে উদ্বিগমুক্ত নহয় বুলি ধাৰণা কৰিছে বিশেষজ্ঞসকলে।