সাধাৰণ নাগৰিকক তিনি বছৰ কাম কৰাৰ সুযোগ দিয়াৰ চিন্তা-চৰ্চা ভাৰতীয় সেনাৰ
ভাৰতীয় সেনা বাহিনীত এইবাৰ সাধাৰণ নগৰিকেও কাম কৰাৰ সুযোগ লাভ কৰিব পাৰিব। ভাৰতীয় সেনাই এই সন্দৰ্ভত ‘ট্যুৰ অফ ডিউটি’ৰ পৰিকল্পনা কৰিছে।
শীঘ্ৰেই এই বিষয়ে এটি প্ৰস্তাৱ উত্থাপন কৰাৰ সম্ভাৱনা আছে।
বুধবাৰে ভাৰতীয় সেনা প্ৰধান জেনেৰেল মনোজ মুকুন্দ নাৰাৱনে এই বিষয়ে জানিবলৈ দি এনে প্ৰস্তাৱ এটা বিবেচনা কৰি থকা বুলি সদৰী কৰে।
তেওঁৰ কয় যে দেশৰ বিভিন্ন কলেজ-বিশ্ববিদ্যালয় ভ্ৰমণ কৰাৰ পাছত যুৱ সমাজ সেনা বাহিনীত যোগ দিয়াৰ বাবে আগ্ৰহী বুলি জানিব পৰা গৈছে।
প্ৰকৃততে তেওঁলোকেও এজন সৈনিকৰ জীৱনৰ অভিজ্ঞতা অৰ্জন কৰিব বিচাৰে।
সেনা প্ৰধান নাৰাৱনে কয়,’’বিভিন্ন বিশ্ববিদ্যালয়ত আমাৰ সেনা বিষয়াসকলে শিক্ষাৰ্থীসকলৰ সৈতে কথা পাতিছে। তেওঁলোকৰ বিভিন্ন অনুষ্ঠানত অংশগ্ৰহণ কৰিছে। সেই অভিজ্ঞতাৰ পৰা সেনা বিষয়াসকলে জানিব পাৰিছে যে যুৱসকলে সৈনিকৰ জীৱন কেনেকুৱা সেই বিষয়ে জানিব বিচাৰে।‘’
তেওঁ কয়,’’যুৱসকলে কেৰিয়াৰ হিচাপে নহ’লেও সৈনিকৰ অভিজ্ঞতা লাভ কৰিব বিচাৰে। সেয়েহে, আমি তেওঁলোকক এটা সুযোগ দিয়া উচিত বুলি চিন্তা কৰিছো।‘’
‘’ট্যুৰ অফ ডিউটি’’আঁচনিত তিনি বছৰৰ বাবে সাধাৰণ নাগৰিকক কাম কৰাৰ সুযোগ দিলে সেনা বাহিনীত বহু যুৱকে যোগদান কৰিব। তদুপৰি, সমাজেও শিক্ষিত তথা শৃংখলাবদ্ধ লোকৰ দ্বাৰা উপকৃত হ’ব,’’-নাৰাৱনে লগতে কয়।
সেনা সূত্ৰ অনুসৰি,‘’ট্যুৰ অফ ডিউটি’’আঁচনিত প্ৰথমতে এশ জন বিষয়া আৰু এক হাজাৰ জোৱান নিযুক্তি দিয়া হ’ব।
ইয়াৰ সফলতাৰ পাছত আগলৈ আৰু তিনি বছৰৰ বাবে পদত নিযুক্ত কৰা হ’ব।
তিনিবছৰৰ ম্যাদ উকলাৰ পাছত বিষয়া তথা জোৱান সকলক পেঞ্চন নহ’লেও কিছু নগদ ধন দিয়া হ’ব।
আনহাতে, যুদ্ধত শ্বহীদ হ’লে সাধাৰণ জোৱান এজনৰ দৰে মৃতকৰ পৰিয়ালে সকলো সুবিধা লাভ কৰিব।
উল্লেখযোগ্য যে ইজৰাইলত ১৮বছৰৰ উৰ্ধৰ সকলো নাগৰিকে দেশখনৰ সেনা বাহিনীত কিছুদিন কাম কৰাটো বাধ্যতামূলক।
এনে এক আৰ্হিৰে ভাৰতীয় সেনায়ো সাধাৰণ নাগৰিকক সাময়িকভাৱে কাম কৰাৰ সুযোগ দিয়াৰ কথা চিন্তা কৰিছে।
অৱশ্যে, ভাৰতীয় সেনা বাহিনীত কাম কৰাটো সাধাৰণ নাগৰিকৰ বাবে বাধ্যতামূলক নহয়, বৰঞ্চ আগ্ৰহৰ ওপৰতহে নিৰ্ভৰ কৰিব।