এটা গৰুৰ দাম ৪০ কোটি টকা! অবিশ্বাস্য যেন লাগিলেও কিন্তু সঁচা

ভাৰতীয় মূলৰ এটা গৰু, যাৰ মূল্য ৪০ কোটি। এই গৰুটো ব্ৰাজিলৰ মিনাছ গেৰাইছ অঞ্চলত বিক্ৰী কৰা হৈছে। ৫৩ মহীয়া এই ‘ভিয়াটিনা-১৯’ গৰুটো গিনিজ বুক অৱ ৱৰ্ল্ড ৰেকৰ্ডত অন্তৰ্ভুক্ত কৰা হৈছে। শেহতীয়াকৈ এনে এটা পোষ্ট ছ’চিয়েল মিডিয়াত ভাইৰেল হৈছে।

জানিব পৰা মতে, পৃথিৱীৰ আটাইতকৈ দামী গৰুটো হ’ল ‘ভিয়াটিনা-১৯’। ব্ৰাজিলত নিলামত ৪.৮ মিলিয়ন ডলাৰত বিক্ৰী হৈছিল, যিটো ভাৰতীয় মুদ্ৰাত প্ৰায় ৪০ কোটি টকা। ভাৰতীয় মূলৰ এই গৰুটোক ইয়াৰ ব্যতিক্ৰমী বৃদ্ধি আৰু শৰীৰৰ গঠনৰ বাবে শ্ৰেষ্ঠ বুলি গণ্য কৰা হয়। এই ভাৰতীয় নেল্লোৰ জাতৰ গৰুটোৰ ওজন ১১০০ কিলোগ্ৰাম।

‘ভিয়াটিনা-১৯’ই কেৱল গিনিজ বুক অৱ ৰেকৰ্ডত স্থান লাভ কৰাই নহয়, ই আন বহুতো পুৰস্কাৰো লাভ কৰিছে। টেক্সাছত অনুষ্ঠিত হোৱা ‘চেম্পিয়নছ অৱ দ্য ৱৰ্ল্ড’ প্ৰতিযোগিতাত ‘মিছ চাউথ আমেৰিকা’ খিতাপও লাভ কৰে। গৰু-ম’হৰ বাবে মিছ ইউনিভাৰ্ছৰ দৰে প্ৰতিযোগিতাত বিচাৰকসকলক ইয়াৰ পেশীবহুল গঠন আৰু কেইবাটাও বিশেষ বৈশিষ্ট্যই মুগ্ধ কৰিছিল।

এই নেল্লোৰ জাতৰ গৰু গৰম জলবায়ুৰ লগত সহজেই খাপ খাব পাৰে। ইয়াৰ উপৰিও ইহঁতৰ ৰোগ প্ৰতিৰোধ ক্ষমতা আন গৰুতকৈ বেছি। এই কাৰণেই বিশ্বজুৰি প্ৰজনন কাৰ্যসূচীত ভায়াটিনা-১৯ অত্যন্ত জনপ্ৰিয় হৈ পৰিছে।

পশু চিকিৎসক লৰানি মেট্ৰিন্সে কয় যে, “ভিয়াটিনা-১৯ নিজেই নিজৰ প্ৰজাতিৰ ভিতৰত অনন্য।”

জনা যায় যে ব্ৰাজিলত বিশ্বৰ ভিতৰতে সৰ্বাধিক সংখ্যক নেল্লোৰ গৰু আছে। ইয়াক অংগোলে বুলিও কোৱা হয়, যিটো ১৮০০ চনত ভাৰতৰ পৰা ব্ৰাজিললৈ নিয়া হৈছিল। এক প্ৰতিবেদনত উল্লেখ কৰা হৈছে যে এই পেশীবহুল জাতৰ উৎপত্তি ভাৰতৰ অন্ধ্ৰপ্ৰদেশৰ প্ৰকাশম জিলাত।