বেটী বাচাও, বেটী পঢ়াও শ্ল’গান দিয়া বিজেপিৰ নেতাৰ হাতত সুৰক্ষিত নহয় দেশৰ মহিলা : হৰিশ ৰাৱট

‘প্ৰধান মন্ত্ৰী নৰেন্দ্ৰ মোডীয়ে দেশবাসীক দিয়া প্ৰতিশ্ৰুতি পালনত সম্পূৰ্ণ ৰূপে ব্যৰ্থ হৈছে। কংগ্ৰেছে ৬০ বছৰ দেশ শাসন কৰি কোনো উন্নয়ন নকৰা বুলি কৈ মোডীয়ে উন্নয়নৰ নামত দেশবাসীৰ পৰা ৬০ মাহ সময় বিচাৰিছিল। উন্নয়নৰ বিপৰীতে মোডীৰ চাৰিবছৰীয়া কাৰ্যকালত দেশখন দুৰ্নীতিময় হৈ পৰিছে। মোডীৰ কাৰ্যকালতে সৰ্বসাধাৰণৰ হাজাৰ হাজাৰ কোটি টকা লৈ দেশ এৰি পলাল বহু লোক। এয়াই মোডীৰ চকুত উন্নয়ন’। এই মন্তব্য জ্যেষ্ঠ কংগ্ৰেছী নেতা হৰিশ ৰাৱট ৰ।

সোমবাৰে সন্ধিয়া হাজোৰ ৰাজীৱ ভৱনত অনুষ্ঠিত এক সংবাদমেলত নিখিল ভাৰত কংগ্ৰেছ কমিটিৰ সাধাৰণ সম্পাদক তথা অসম কংগ্ৰেছৰ তত্ত্বাৱধায়ক ৰাৱটে মোডী নেতৃত্বাধীন বিজেপি চৰকাৰক আক্ৰমণৰ মূল লক্ষ্য হিচাপে লৈ আৰু কয় যে ‘সবকা সাথ সবকা বিকাশ’ৰ শ্ল’গানেৰে দেশৰ উন্নয়নৰ কথা কোৱা আৰু চৰকাৰ গঠন কৰিলে বিদেশৰ পৰা ক’লা ধন ঘূৰাই অনা মোডীৰ ফিতাহি আজি ক’ত।

উল্লেখ্য যে বিজেপি চৰকাৰে হিচাপ দিওক, উত্তৰ দিয়ক শীৰ্ষক দেশজোৰা কাৰ্যসূচীৰ অংশ হিচাপে হাজোৰ ৰাজীৱ ভৱনত অনুষ্ঠিত সংবাদমেলত অসমৰ তত্ত্বাৱধায়কজনে আৰু কয় যে বেটী বাচাও, বেটী পঢ়াও শ্ল’গান দিয়া বিজেপি চৰকাৰৰ দিনতে আজি তেওঁলোকৰ নেতাৰ হাততে সুৰক্ষিত নহয় দেশৰ মহিলা সমাজ। প্ৰকৃততে এয়াই দেশৰ পৰিৱৰ্তন।

এন আৰ চি সন্দৰ্ভতো কংগ্ৰেছৰ বৰ্ষীয়ান নেতাজনে তাৎপৰ্যমূলক মন্তব্য কৰি কয় যে বিজেপিয়ে এন আৰ চিখনক জাতি-ধৰ্ম-ভাষা হিচাপে ভাগ কৰাৰ স্বাৰ্থত ব্যৱহাৰ কৰিছে। যিটো কাৰ্য সঁচাকৈয়ে দুৰ্ভাগ্যজনক।

আনহাতে অসমৰ বিত্ত মন্ত্ৰী তথা প্ৰভাৱশালী ৰাজনৈতিক নেতা ড০ হিমন্ত বিশ্ব শৰ্মা সন্দৰ্ভত ৰাৱটে তীৰ্যক মন্তব্য কৰি কয় যে স্বাৰ্থ আৰু ক্ষমতাৰ লোভত দৌৰি হিমন্ত বিশ্ব শৰ্মাই ভাল পায়। সেয়ে তেওঁ কংগ্ৰেছ দল আৰু পিতৃতুল্য তৰুণ গগৈক বিশ্বাসঘাতকতা কৰিছে।

কালি বিয়লি অনুষ্ঠিত হোৱা সংবাদমেলত প্ৰদেশ কংগ্ৰেছৰ সভাপতি ৰিপুন বৰা, বিৰোধী দলপতি দেৱব্ৰত শইকীয়া, প্ৰদেশ কংগ্ৰেছৰ সাধাৰণ সম্পাদক তথা স্থানীয় নেতা দুলু আহমেদৰ লগতে বহুতো কংগ্ৰেছ নেতা উপস্থিত আছিল।