ভাৰতত ক্ৰমাৎ হ্ৰাস পাইছে কোভিডৰ সংক্ৰমণ; আৰোগ্যৰ হাৰ ৯৬ শতাংশলৈ বৃদ্ধি

ভাৰতত ক’ৰ’না ভাইৰাছৰ সংক্ৰমণৰ হাৰ কিছু পৰিমাণে হ্ৰাস পালেও এতিয়াও ইয়াৰ সংহাৰ অব্যাহত আছে।

বিগত ২৪ ঘণ্টাত ভাৰতত ক’ৰ’নাৰ সংক্ৰমণৰ ফলত পুনৰ ২৬৪ গৰাকী ব্যক্তিয়ে প্ৰাণ হেৰুৱাবলগীয়া হয়।

ইয়াৰ ফলত দেশত ক’ৰ’নাৰ সংক্ৰমণৰ ফলত প্ৰাণ হেৰুওৱা ব্যক্তিৰ সংখ্যাই ডেৰ লাখৰ ঘৰ অতিক্ৰম কৰে।

দেশত এতিয়ালৈ ক’ৰ’নাৰ সংক্ৰমণৰ ফলত ১,৫০,১১৪ গৰাকী ব্যক্তিয়ে প্ৰাণ হেৰুৱাইছে।

আনহাতে, বিগত ২৪ ঘণ্টাত ভাৰতত ক’ৰ’নাৰ ফলত নতুনকৈ ১৮,০৮৮ গৰাকী ব্যক্তি সংক্ৰমিত হৈছে।

ইয়াৰ ফলত দেশত মুঠ ক’ৰ’না সংক্ৰমিত ব্যক্তিৰ সংখ্যা ১,০৩,৭৪,৯৩২ গৰাকীলৈ বৃদ্ধি পায়।

আনহাতে, বিগত ২৪ ঘণ্টাত দেশৰ বিভিন্ন ৰাজ্যত ২১,৩১৪ গৰাকী ব্যক্তিয়ে চিকিৎসাৰ অন্তত ক’ৰ’নাৰ সংক্ৰমণৰ পৰা আৰোগ্য লাভ কৰে।

ইয়াৰ ফলত দেশত এতিয়ালৈ মুঠ ৯৯,৯৭,২৭২ গৰাকী ব্যক্তি ক’ৰ’নাৰ সংক্ৰমণৰ পাৰ সুস্থ হৈ উঠিছে।

ভাৰতত আৰোগ্যৰ হাৰ ৯৬ শতাংশ অতিক্ৰম কৰিছে। এতিয়া দেশৰ বিভিন্ন ৰাজ্যত মুঠ ২,২৭,৫৪৬ গৰাকী সক্ৰিয় কোভিড ৰোগী চিকিৎসাধীন হৈ আছে।