চীনৰ কাৰ্যত ক্ষুব্ধ WHO; বিজ্ঞানীৰ দলটোক ক’ৰ’না তদন্তৰ অনুমতি কেতিয়া দিয়া হ’ব?

ক’ৰ’না ভাইৰাছক লৈ চীনে দেখুৱাই অহা ব্যৱহাৰত ক্ষুব্ধ হৈ পৰিছে বিশ্ব স্বাস্থ্য সংস্থা (WHO)।

বিশ্ব স্বাস্থ্য সংস্থাৰ মুৰব্বী টেড্ৰ’ছ অধানম ঘেব্ৰিয়াছুছে কয় যে ক’ৰ’না ভাইৰাছৰ উৎপত্তি সম্পৰ্কে তদন্ত কৰিবলৈ WHO-ৰ এটা দল চীনলৈ পঠোৱা হৈছিল।

কিন্তু এই পৰ্যন্ত দলটোক চীনে তদন্ত কৰাৰ অনুমতি প্ৰদান কৰা নাই আৰু ইয়াকে লৈ এতিয়া ক্ষুন্ন হৈ পৰিছে WHO।

WHOৰ মুৰব্বী ঘেব্ৰিয়াছুছে এখন সংবাদ মেল সম্বোধন কৰি কয় যে জানিব পাৰিছো যে চীনে এতিয়াও আমাৰ ক’ভিড তদন্তকাৰী দলটোক তদন্তৰ অনুমতি প্ৰদান কৰা নাই। এয়া অত্যন্ত দুখঃজনক।

তেওঁ এই খবৰ অত্যন্ত নিৰাশাজনক বুলি মন্তব্য কৰি কয় যে চীনত এই ভাইৰাছটো কেনেদৰে জন্ম হ’ল সেয়া আমাৰ বিজ্ঞানীৰ দলটোৱে তদন্ত কৰি জানিব বিচাৰিছে।

উল্লেখ্য যে বিজ্ঞানীৰ এটা দল চীনৰ য়ুহানলৈ যাব বিচাৰি আছিল, য’ৰ পৰা সমগ্ৰ বিশ্বজুৰি সংক্ৰমণ ঘটিছিল ক’ৰ’না ভাইৰাছৰ।

কিন্তু চীনে এইধৰণৰ তদন্তৰ তীব্ৰ বিৰোধিতা কৰি থকা পৰিলক্ষিত হৈছিল আৰু এতিয়াও বিৰোধ কৰি আছে।

চীনৰ এই কাৰ্যৰ বাবে দেশখন সন্দেহৰ আৱৰ্তত সোমাই পৰিছিল যে তেওঁলোকে তেওঁলোকৰ লেবত এই ভাইৰাছবিধৰ উৎপত্তি কৰিছে।

আমেৰিক তথা য়ুৰোপৰ কেইবাখনো দেশে আৰম্ভণিৰ পৰাই চীনৰ বিৰুদ্ধে এনেধৰণৰ অভিযোগ উত্থাপন কৰি আহিছে।