ব্ৰইলাৰ খালে আক্ৰান্ত হ’ব ক’ৰ’না ভাইৰাছত! এই খবৰে দেউলীয়া কৰিব ওলাইছে বহু লোকক
ব্ৰইলাৰ মূৰ্গী খালে ক’ৰ’না ভাইৰাছত আক্ৰান্ত হ’ব বুলি ওলোৱা অপপ্ৰচাৰে ভয়ংকৰভাৱে ক্ষতিগ্ৰস্ত কৰিছে ভাৰতৰ হাঁহ-কুকুৰাৰ উদ্যোগটোক।
সৰ্বসাধাৰণ লোকৰ মাজত এই খবৰ বিয়পি পৰাত চিকেনৰ চাহিদা কমি অহাৰ লগতে উদ্যোগটোৱে যোৱা তিনি সপ্তাহত ১৩ বিলিয়ন টকা (১৮২ মিলিয়ন)ৰ লোকচানৰ সন্মুখীন হৈছে।
কোনো দুষ্ট চক্ৰই চলোৱা এই অপপ্ৰচাৰৰ বাবে অভাৱনীয়ভাৱে দাম হ্ৰাস পোৱাত এতিয়া সৰু-সৰু ব্যৱসায়ীসকলৰ মাজত এক হাহকাৰ পৰিৱেশে বিৰাজ কৰিছে।
ইয়াৰ উপৰি ছয়াবিন আৰু কৰ্ন উৎপাদনকাৰী সকলেও ভয়ংকৰ ক্ষতিগ্ৰস্ত হোৱা পৰিলক্ষিত হৈছে কিয়নো এই দুয়োবিধ সামগ্ৰী হাঁহ-কুকুৰাৰ খাদ্য হিচাপে ব্যৱহৃত হয়। যোৱা তিনি সপ্তাহত ছয়াবিন আৰু কৰ্ন সামগ্ৰীৰ দাম ৮ শতাংশলৈ হ্ৰাস পাইছে।
এনেধৰণৰ উৰা বাতৰি বিয়পোৱা লোকসকলৰ বিৰুদ্ধে উচিত পদক্ষেপ গ্ৰহণৰ বাবে আৰক্ষীক নিৰ্দেশ দিছে মহাৰাষ্ট্ৰ চৰকাৰে।
ব্ৰইলাৰ মাংসৰ চাহিদা কমি অহাৰ লগে লগে ইয়াৰ দাম অভাৱনীয়ভাৱে হ্ৰাস পোৱাত এতিয়া প্ৰতিদিনে এই উদ্যোগটোৱে ১২০ মিলিয়ন টকাৰ লোকচানৰ সন্মুখীন হৈছে।
উল্লেখ্য যে চীনত ৭০ হাজাৰৰো অধিক লোক ক’ৰ’না ভাইৰাছত আক্ৰান্ত হৈছে আৰু এই পৰ্যন্ত দেশখনত ১,৭৭০ জন লোকে প্ৰাণ হেৰুৱাইছে। ইয়াৰ বিপৰীতে ভাৰতত এইপৰ্যন্ত মাত্ৰ তিনিটাহে এই ভাইৰাছত আক্ৰান্ত হোৱা বুলি নিশ্চিত হৈছে।
চীনত মহামাৰি ৰূপ ধাৰণ কৰাৰ পিছতেই ভাৰতত কোনো দুষ্ট চক্ৰই ব্ৰইলাৰ মাংসৰ পৰা ক’ৰ’না ভাইৰাছ বিয়পে বুলি হোৱাটছ এপৰ জৰিয়তে প্ৰচাৰ কৰাৰ পিছতেই সৰ্বাসাধাৰণৰ মাজত ব্যাপক প্ৰতিক্ৰিয়াৰ সৃষ্টি হয় আৰু বেছিভাগেই ইয়াৰ মাংস খোৱা বন্ধ কৰি দিয়ে।
লক্ষ্যণীয় কথাটো হ’ল বিশেষজ্ঞসকলে এই অপপ্ৰচাৰক সম্পূৰ্ণৰূপে নাকচ কৰিছে।