মোদীৰ লক্ষ্য উত্তৰ-পূবত অধিক জাপানী বিনিয়োগ

মোদীয়ে জাপানৰ প্ৰধান মন্ত্ৰী শ্বিনজ’ আবেক আপ্যায়নৰ বাবে গুৱাহাটী আৰু ইম্ফালক বাচি লোৱাৰ লক্ষ্য হৈছে উত্তৰ-পূবৰ বাবে অধিক জাপানী বিনিয়োগ আদায় কৰা।

চলিত ডিচেম্বৰৰ মাজভাগত হ’ব লগা বৈঠক সম্পৰ্কে কেন্দ্ৰীয় চৰকাৰৰ বিষয়া এগৰাকীয়ে নৰ্থইষ্ট নাওত এই কথা সদৰী কৰিছে।

বিষয়াগৰাকীয়ে জনোৱামতে, প্ৰধান মন্ত্ৰী আবেক অঞ্চলটোত ইতিমধ্যে চলি থকা প্ৰায় এক ডজন জাপানী প্ৰকল্পৰ অগ্ৰগতি দেখুওৱা হ’ব।

“কিন্তু মূলতঃ আন্তঃগাঁথনি খণ্ডৰ বাবে নতুন প্ৰকল্পৰ এখন তালিকা যুগুত কৰা হৈছে আৰু এইক্ষেত্ৰত জাপানী বিনিয়োগ বিচৰা হ’ব পাৰে,” ড’নাৰ মন্ত্ৰ্যালয়ৰ বিষয়াগৰাকীয়ে জনায়।

১৪সংখ্যক ভাৰত-জাপান বৈঠকখনৰ দিন ঘোষণা কৰা হোৱা নাই যদিও গুৱাহাটীতে মোদীয়ে আবেক আদৰণি জনাব।

তাৰ পিছত মোদীয়ে জাপানী প্ৰধান মন্ত্ৰীগৰাকীক ইম্ফাললৈ লৈ যাব।

জাপানী প্ৰধান মন্ত্ৰীগৰাকীক ইম্ফালত থকা দ্বিতীয় বিশ্ব মহাসমৰৰ যুদ্ধভূমি বিশেষকৈ তাত থকা শান্তি সংগ্ৰহালয় দেখুৱাবলৈ নিয়া হ’ব।

বিদেশ মন্ত্ৰ্যালয়ৰ বিষয়াই জনোৱামতে, জাপানী প্ৰধান মন্ত্ৰীগৰাকীৰ সৈতে বিশেষ সংযোগ স্থাপন কৰিবলৈ মোদীয়ে নেতাজী সুভাষ বসু ফেক্তৰটো খেলিব।

“ঘৰুৱাভাৱে কংগ্ৰেছৰ কেৱল ভেটি দুৰ্বল কৰাই নহয়, জাপানৰ সৈতে সংযোগ স্থাপন কৰাৰ বাবেও, আন ভাৰতীয় প্ৰধান মন্ত্ৰীসকলৰ বিপৰীতে মোদীয়ে বসু ফেক্তৰটো জোৰ দি খেলে,” ৰাজনৈতিক বিশ্লেষক সব্যসাচী বসু ৰয় চৌধুৰীয়ে কয়।

ইম্ফালত দ্বিতীয় বিশ্ব যুদ্ধৰ শেষচোৱাত জাপান-মিত্ৰ আই এন এ (Indian National Army)ই সন্মিলিত বাহিনীৰ বিৰুদ্ধে যুঁজত বহু সেনা হেৰুৱাইছিল।