নগা বিদ্ৰোহী সংগঠনক লৈ অস্বস্তিত পৰা কেন্দ্ৰই এইবাৰ দায়িত্ব দিলে আই বিৰ সঞ্চালকক

ক্ৰমে আয়ত্বৰ বাহিৰলৈ যাব খোজা নাগালেণ্ডৰ বিদ্ৰোহী সংগঠনৰ ওপৰত নিয়ন্ত্ৰণৰ বাবে এইবাৰ আগবাঢ়ি আহিছে স্বয়ং প্ৰধান মন্ত্ৰীৰ কাৰ্যালয়।

বাতৰি অনুসৰি, নগাসকলৰ সৈতে আলোচনাৰ বাবে এইবাৰ কেন্দ্ৰই দায়িত্ব দিছে ইন্টেলিজেন্স ব্যুৰোৰ ডাইৰেক্টৰ অৰবিন্দ কুমাৰক।

আনহাতে দীৰ্ঘদিন ধৰি মধ্যস্থতাকাৰীৰ ভূমিকা পালন কৰা আৰ এন ৰবিক এই দায়িত্বৰ পৰা অব্যাহতি দিয়া হৈছে।

বিগত প্ৰায় ছয় বছৰ ধৰি একাধিক বিচ্ছিন্নতাবাদী নগা সংগঠনৰ সৈতে আৰ এন ৰবিয়ে আলোচনা চলাই আহিছিল যদিও কোনো সুফল দেখা নগ’ল।

আনহাতে, ইয়াৰ মাজতে স্বাধীনতা দিৱসৰ এদিন পূৰ্বে নগা সংগঠন এনএছচিএন(আইএম)ৰ নেতা থুইংগালাং মুইভাই দাবী কৰে যে ভাৰত চৰকাৰে ৫বছৰ পূৰ্বে নাগালেণ্ডৰ সাৰ্বভৌমত্বক স্বীকৃতি দিছে।

তেওঁ লগতে কৈছিল যে নগাসকলে ভাৰতৰ সৈতে সহাৱস্থান কৰিব কিন্তু কেতিয়াও ভাৰতৰ সৈতে মিলি নাযায়।

সেয়াই নহয়, ২০১৫চনত ভাৰত চৰকাৰ আৰু নগা বিদ্ৰোহী সংগঠন এনএছচিএন(আইএম)ৰ মাজত যি গোপন চুক্তি হৈছিল সেই চুক্তিপত্ৰও মুইভাই সদৰী কৰে।

এই বিষয়টোৱে স্বাভাৱিকতে কেন্দ্ৰক অস্বস্তিত পেলাইছে আৰু ইয়াকে লৈ প্ৰধান মন্ত্ৰী মোদী নিজেই উদ্বিগ্ন।

এনে পৰিস্থিতিত আৰ এন ৰবিৰ স্থানত আই বিৰ ডাইৰেক্টৰ অৰবিন্দ কুমাৰক নগা বিদ্ৰোহী সংগঠনসমূহৰ সৈতে আলোচনাৰ দায়িত্ব অৰ্পন কৰা হৈছে।