গিৰিজানন্দ চৌধুৰী বিশ্ববিদ্যালয়ত কৃষ্টি সংস্কৃতি, ভাষা-সাহিত্য সম্পৰ্কীয় আন্তঃৰাষ্ট্ৰীয় সন্মিলন

গিৰিজানন্দ চৌধুৰী বিশ্ববিদ্যালয়ৰ ইংৰাজী আৰু বৈদেশিক ভাষা বিভাগে “বিয়ণ্ড বৰ্ডাৰ এণ্ড বাউন্ডেৰীঃ ইন্ডিজেনাছ কালচাৰ নাও এণ্ড ডেন” শীৰ্ষক এখনি আন্তঃৰাষ্ট্ৰীয় সন্মিলনৰ আয়োজন কৰিছে।

আন্তঃৰাষ্ট্ৰীয় পৰ্য্যায়ত হ’বলগীয়া উক্ত সন্মিলনখনত সহযোগ কৰিব মস্কো ৰুছ ৰাষ্ট্ৰীয় কলা আৰু সামাজিক অধ্যয়ন বিষয়ৰ বিশ্ববিদ্যালয়ে(RSUH)।

অহা ২৩ আৰু ২৪ জানুৱাৰী তাৰিখে আজাৰাস্থিত বিশ্ববিদ্যালয়ৰ চৌহদত অনুষ্ঠিত হ’বলগীয়া এই সন্মিলনত বিভিন্ন জাতি, জনজাতিৰ লগতে সংখ্যালঘু জনগোষ্ঠী সমূহৰ থলুৱা কৃষ্টি সংস্কৃতি, ভাষা -সাহিত্য আৰু ইয়াৰ সুৰক্ষা তথা সংৰক্ষণৰ বিষয়ে আলোচনা কৰা হ’ব।

উক্ত বৈঠকত শিক্ষাবিদ, গৱেষক আৰু ছাত্ৰ ছাত্ৰীসকলে সচেতনতা গঢ়ি তুলি সমস্যাসমূহক কেনেধৰণে সমাধান কৰিব পাৰি বা তাৰ সঠিক পথ উদ্ভাৱন কৰিব পৰা যায় সেই বিষয়ত বিস্তৃত আলোচনা কৰিব।

ৰুছ ৰাষ্ট্ৰীয় কলা আৰু সামাজিক অধ্যয়ন বিষয়ৰ বিশ্ববিদ্যালয়, মস্কোৰ ( RSUH) অধ্যাপক আলেকজেণ্ডাৰ স্টলয়াৰভ আৰু ড০ ইন্দিৰা গাজিয়াভা, হাইদৰাবাদৰ ইংৰাজী আৰু বৈদেশিক ভাষা বিভাগৰ প্ৰাক্তন উপাচাৰ্য অধ্যাপক অভয় মৌৰ্য, দ্যা ৰাচিয়ান ফেডাৰেচন, ডাইৰেক্টৰ ৰাচিয়ান হাউচ, তিৰুবনন্টপুৰমৰ অবৈতনিক পৰামৰ্শ দাতা মি. ৰাথেচ চি নায়াৰ আৰু বাংলাদেশ মুক্ত বিশ্ববিদ্যালয়, ঢাকাৰ ড০ মিজানুৰ ৰহমান মুখ্য বক্তা হিচাপে অনুষ্ঠানত উপস্থিত থাকিব।

উক্ত আলোচনাত থাকিব বিশ্ববিদ্যালয়ৰ শিক্ষক শিক্ষয়িত্ৰী, ছাত্ৰ ছাত্ৰী, শিক্ষাবিদ, গৱেষক সকলৰ লগতে কেইবাখনো উচ্চ স্তৰীয় বিশ্ববিদ্যালয়, মহাবিদ্যালয় আৰু প্ৰতিষ্ঠানৰ প্ৰায় ১০০ জনৰো অধিক সদস্য।

বৌদ্ধিক চিন্তা চৰ্চাৰ দ্বাৰা মানসিক উৎকৰ্ষ সাধন কৰি, কল্যাণমুখী সমাজ এখন গঠনত এনে সন্মিলনৰ ভূমিকা যথেষ্ট। এই ক্ষেত্ৰত গিৰিজানন্দ চৌধুৰী বিশ্ববিদ্যালয় এই পদক্ষেপ নিশ্চয়কৈ শলাগীবলগীয়া।