ইৰাণত ৫৪ দিন ধৰি ইণ্টাৰনেট সেৱা বন্ধ, ১ কোটি লোকৰ জীৱিকালৈ নামি আহিছে ঘোৰ অমানিশা

ইৰাণত সম্পূৰ্ণৰূপে ইণ্টাৰনেট সেৱা বন্ধ হোৱা ৫৪ দিন অতিক্ৰম কৰিছে। দেশখনৰ তথ্য আৰু যোগাযোগ প্ৰযুক্তি মন্ত্ৰী ছাট্টাৰ হাছেমীয়ে সতৰ্ক কৰি দিছে যে এইদৰে ইণ্টাৰনেট সেৱা ব্যাহত হৈ থাকিলে সুস্থিৰ ইণ্টাৰনেটৰ ওপৰত নিৰ্ভৰশীল প্ৰায় ১ কোটি লোকৰ চাকৰি আৰু জীৱিকালৈ গুৰুতৰ ভাবুকি নামি আহিব পাৰে।

মন্ত্ৰীগৰাকীয়ে লগতে কয় যে ইয়াৰ ফলত ক্ষতিগ্ৰস্ত হোৱা লোকসকলৰ বেছিভাগেই মধ্যম আৰু নিম্ন আয়ৰ শ্ৰেণীৰ। তেওঁ জানিবলৈ দিয়ে যে ইণ্টাৰনেটৰ এই ধাৰাবাহিক অস্থিৰতাই এই বৃহৎ জনসংখ্যাৰ নিয়োগৰ ক্ষেত্ৰত প্ৰত্যক্ষ ভাবুকি কঢ়িয়াই আনিছে। ইয়াৰ ফলত দেশখনত গভীৰ সামাজিক আৰু অৰ্থনৈতিক প্ৰভাৱ পৰাৰ আশংকা আছে বুলিও তেওঁ মন্তব্য কৰে।

আমেৰিকা যুক্তৰাষ্ট্ৰ আৰু ইজৰাইলৰ আক্ৰমণ আৰম্ভ হোৱাৰ পিছত আৰু সংঘাত ক্ৰমান্বয়ে বৃদ্ধি পোৱাৰ লগে লগে ইছলামিক প্ৰজাতন্ত্ৰৰ কৰ্তৃপক্ষই সাধাৰণ ৰাইজৰ বাবে বিশ্বব্যাপী ইণ্টাৰনেট ব্যৱহাৰৰ ওপৰত কঠোৰ নিষেধাজ্ঞা আৰোপ কৰিছিল। এই নিষেধাজ্ঞা আজিও বাহাল আছে, যাৰ বাবে কেৱল এমুঠিমান ব্যৱহাৰকাৰীয়েহে বৰ্তমান মুকলি সংযোগ লাভ কৰিবলৈ সক্ষম হৈছে।

একে সময়তে, ক্ৰমান্বয়ে বৃদ্ধি পোৱা বিত্তীয় ক্ষতিৰ বিষয়ে অৰ্থনৈতিক বিশেষজ্ঞসকলেও গভীৰ উদ্বেগ প্ৰকাশ কৰিছে। যোৱা সপ্তাহত ইৰাণ চেম্বাৰ অৱ কমাৰ্চৰ নলেজ-বেছড কমিশ্যনৰ মুৰব্বীগৰাকীয়ে প্ৰকাশ কৰা অনুসৰি, এই ইণ্টাৰনেট বন্ধৰ বাবে দেশখনে প্ৰতিদিনে প্ৰায় ৩০ৰ পৰা ৪০ মিলিয়ন ডলাৰ প্ৰত্যক্ষ লোকচানৰ সন্মুখীন হৈছে। পৰোক্ষ প্ৰভাৱসমূহক সাঙুৰি এই লোকচানৰ পৰিমাণ দৈনিক ৭০ৰ পৰা ৮০ মিলিয়ন ডলাৰলৈকে বৃদ্ধি পাইছে।

যোৱা কেইসপ্তাহমানৰ পৰা ইণ্টাৰনেটৰ জৰিয়তে পৰিচালিত ব্যৱসায় আৰু সেৱা প্ৰদানকাৰী কোম্পানীসমূহত বহু কৰ্মচাৰীক চাকৰিৰ পৰা বৰ্খাস্ত কৰাৰ খবৰো পোহৰলৈ আহিছে। এই পৰিস্থিতিয়ে ইৰাণৰ অৰ্থনীতি আৰু নিয়োগ বজাৰত পৰিবলগীয়া দীৰ্ঘম্যাদী প্ৰভাৱক লৈ সাধাৰণ ৰাইজৰ লগতে ব্যৱসায়ীসকলৰ মনতো অধিক ভয় আৰু শংকাৰ সৃষ্টি কৰিছে।