ক্ৰিকেটৰ পৰিভাষা সলনি কৰি দিয়া তিনিগৰাকী ক্ৰিকেটাৰৰ নাম ক’লে ইনজামাম উল হকে

পাকিস্তান ক্ৰিকেট দলৰ প্ৰাক্তন অধিনায়ক তথা দেশখনৰ অন্যতম আগশাৰীৰ বেটছমেন ইনজামান উল হকে তিনিজন বেটছমেনৰ বাবে ক্ৰিকেট খেলৰ পৰিভাষা সম্পূৰ্ণৰূপে সলনি হৈ যোৱা বুলি তাৎপৰ্যপূৰ্ণ মন্তব্য কৰিছে।

হকৰ মতে ৱেষ্টইণ্ডিজৰ ভিভিয়ান ৰিচাৰ্ডছ, শ্ৰীলংকাৰ ছনথ জয়সূৰ্য্যা আৰু দক্ষিণ আফ্ৰিকাৰ এ বি ডি ভিলিয়াৰ্ছে সলনি কৰি দিছে ক্ৰিকেট খেলাৰ ধৰণ।

এটা য়ু টিউব চেনেলযোগে ইনজামামে কয়, ‘বহু বছৰ পূৰ্বে ক্ৰিকেট খেলাৰ ধৰণ সলনি কৰাৰ প্ৰথম কাম কৰিছিল ৰিচাৰ্ডছে। সেই সময়ত বেগী বলাৰৰ বিৰুদ্ধে সকলো বেটছমেনেই বেকফুটত খেলিছিল। কিন্তু বেগী বলাৰক যে ফ্ৰণ্টফুটত খেলি আক্ৰমণ কৰিব পাৰি সেই কথা সকলোকে দেখুৱাই দিছিল ৰিচাৰ্ডছে’।

জয়সূৰ্য্যা সন্দৰ্ভত তেওঁ কয়, ‘দ্বিতীয়টো সলনি কৰিলে জয়সূৰ্য্যাই। ইনিংছৰ প্ৰথম ১৫ অ’ভাৰত বেগী বলাৰৰ বিৰুদ্ধে আক্ৰমণ কৰা তেওঁৱেই আৰম্ভ কৰিছিল। তেওঁ প্ৰথম ১৫ অ’ভাৰত ইনফিল্ডৰ ওপৰেৰে শ্বট খেলি ক্ৰিকেটৰ পৰিভাষা সলনি কৰি দিয়ে। তেওঁৰ আগেয়ে কোনো বেটছমেনে যদি এনেধৰণে বেটিং কৰে তেন্তে তেওঁক বেটছমেন হিচাপে গণ্য কৰা হোৱা নাছিল’।

প্ৰাক্তন পাকিস্তানী অধিনায়কগৰাকীয়ে এ বি ডি ভিলিয়াৰ্ছ সন্দৰ্ভতো কেতবোৰ গুৰুত্বপূৰ্ণ মন্তব্য কৰি কয়, ‘ক্ৰিকেটৰ পৰিভাষা সলনি কৰা তৃতীয়গৰাকী খেলুৱৈ হ’ল ভিলিয়াৰ্ছ। বৰ্তমান সময়ত আক্ৰমণ পদ্ধতিত খেলা এদিনীয়া আৰু টি-২০ ক্ৰিকেটৰ বাবে ভিলিয়াৰ্ছকে মই জগৰীয়া কৰিম’।

তেওঁ লগতে কয় যে আগৰ বেটছমেনসকলে চিধা বেটেৰে খিলিছিল, কিন্তু ভিলিয়াৰ্ছে পেডল চুইপ, ৰিভাৰ্চ চুইপ খেলিবলৈ আৰম্ভ কৰি দিয়ে।