১৩ সংখ্যক আই পি এলৰ উদ্বোধনী মেচে গঢ়িলে অনবদ্য অভিলেখ

১৯ ছেপ্তেম্বৰ অৰ্থাৎ যোৱা শনিবাৰে আই পি এলৰ ১৩ সংখ্যক সংস্কৰণৰ উদ্বোধনী মেচখন প্ৰায় ২০ কোটি লোকে উপভোগ কৰিছে বুলি আজি বি চি চি আইৰ সচিব জয় শ্বাহে প্ৰকাশ কৰে।

শ্বাহে জনোৱা মতে, বিশ্বৰ যিকোনো দেশৰ যিকোনো প্ৰতিযোগিতাৰে উদ্বোধনী মেচ উপভোগ কৰা দৰ্শকৰ সংখ্যাতকৈ এয়া যথেষ্ট বেছি।

উল্লেখ্য যে যোৱা শনিবাৰে আই পি এলৰ ১৩ সংখ্যক সংস্কৰণৰ উদ্বোধনী মেচখন আবু ধাবিৰ শ্বেখ জায়েদ ষ্টেডিয়ামত যোৱাবাৰৰ চেম্পিয়ন মুম্বাই ইণ্ডিয়ানছ বনাম চেন্নাই ছুপাৰ কিংছৰ মাজত অনুষ্ঠিত হৈছিল।

চলিত সংস্কৰণৰ প্ৰথম মেচখনত ধোনী নেতৃত্বাধীন চেন্নাই ছুপাৰ কিংছে ৰোহিত শৰ্মা নেতৃত্বাধীন মুম্বাই ইণ্ডিয়ানছক ৫ উইকেটত পৰাস্ত কৰিছিল।

বি চি চি আইৰ সচিব জয় শ্বাহে অধ্যক্ষ সৌৰভ গাংগুলীক টেগ কৰি এটা টুইটত কয়, “আই পি এলৰ উদ্বোধনী মেচত এটা নতুন ৰেকৰ্ড গঢ়িবলৈ সক্ষম হৈছে। বি চি চি আইৰ মতে, উক্ত মেচখন ২০ কোটি লোকে উপভোগ কৰিছে। যিকোনো দেশৰ যিকোনো প্ৰতিযোগিতাৰে উদ্বোধনী মেচৰ তুলনাত এইটো যথেষ্ট সৰ্বাধিক সংখ্যা”।