আমেৰিকাৰ ৪খন বন্ধু দেশৰ ৮খন দলঙত আক্ৰমণ কৰি প্ৰতিশোধ ল’ব ইৰাণে! ট্ৰাম্পক প্ৰত্যাহ্বান জনাই দিলে তালিকা
আমেৰিকা-ইজৰাইল বাহিনীয়ে কেৱল ইৰাণকে নহয়, সম্ভৱতঃ সমগ্ৰ পশ্চিম এছিয়াৰ আটাইতকৈ দীঘল দলংখনতো আক্ৰমণ কৰিছে। এইবাৰ তেহৰানেও ইয়াৰ প্ৰতিশোধ ল’বলৈ সাজু হৈছে। উপসাগৰীয় দেশসমূহৰ আঠখন গুৰুত্বপূৰ্ণ দলঙৰ ওপৰত তেওঁলোকৰ দৃষ্টি আছে। ইৰাণে সেই দলংসমূহৰ নাম আৰু মানচিত্ৰৰে এখন তালিকা প্ৰকাশ কৰিছে।
দুদিনমান পূৰ্বে ইৰাণৰ কাৰাজৰ বি-১ দলঙত আমেৰিকা আৰু ইজৰাইল বাহিনীয়ে আক্ৰমণ চলাইছিল। ইয়াৰ পিছত ড’নাল্ড ট্ৰাম্পে ইৰাণক সকীয়াই দিছিল যে এতিয়াও সময় আছে। আপোচ নহ’লে পৰিস্থিতি আৰু বেয়া হ’ব। ইৰাণক ‘প্ৰস্তৰ যুগ’লৈ প্ৰেৰণ কৰা হ’ব বুলিও সকীয়াই দিয়ে আমেৰিকাৰ ৰাষ্ট্ৰপতিগৰাকীয়ে। কিন্তু ইৰাণৰ ৰিভল্যুচনেৰী গাৰ্ড কৰ্পছে স্পষ্ট কৰি দিছে যে তেওঁলোকে এই ভাবুকিৰ আগত নতশিৰ হ’বলৈ সাজু নহয়।
ফাৰ্চ নিউজৰ এক প্ৰতিবেদন অনুসৰি ইৰাণৰ ‘হিট লিষ্ট’ৰ ভিতৰত আছে কুৱেইটৰ শ্বেইখ জাবেৰ আল আহমদ আল-ছাবাহ সাগৰীয় দলং, সংযুক্ত আৰব আমিৰশ্বাহীৰ শ্বেইখ জায়েদ, আল মকতা আৰু শ্বেইখ খলিফা দলং। ইয়াৰ উপৰিও আছে বাহৰেইনৰ কিং ফাহদ কজৱে, জৰ্ডানৰ কিং হুছেইন, ডামিয়া আৰু আব্দুন দলং।
ইৰাণৰ বাবে বি-১ দলংখন অতি গুৰুত্বপূৰ্ণ। এই দলঙে তেহৰাণক পশ্চিম চহৰ কাৰাজৰ সৈতে সংযোগ কৰে। ইৰানে দাবী কৰিছে যে আমেৰিকা আৰু ইজৰাইল বাহিনীয়ে দলংখনত বোমা বিস্ফোৰণ ঘটোৱাত কমেও ৮ জন লোক নিহত হোৱাৰ লগতে কমেও ৯৫ জন আহত হৈছে।
আক্ৰমণৰ পিছত ইৰাণৰ বৈদেশিক মন্ত্ৰী আব্বাছ আৰাঘচিয়ে নিজৰ এক্স হেণ্ডেলত লিখিছে, “অসামৰিক আন্তঃগাঁথনি আক্ৰমণ কৰি ইৰাণক আত্মসমৰ্পণ কৰিবলৈ বাধ্য কৰিব নোৱাৰি। এই কাণ্ডই শত্ৰুৰ পৰাজয় আৰু নৈতিক পৰাজয় স্বীকাৰ কৰাৰ ইংগিতহে দিয়ে।”