অৱশেষত অখিল গগৈৰ কথা ৰাখিলে নেকি সদৌ অসম ছাত্ৰ সন্থাই ?
কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে মুকলি চিঠিৰ জৰিয়তে দুবাৰকৈ অসমৰ জাতীয় সংগঠন সমূহক ঐক্যবদ্ধ সংগ্ৰামৰ বাবে আহ্বান জনাইছিল।
তেওঁ কা বিৰোধী আন্দোলনক নতুন ৰূপত তীব্ৰতৰ কৰি তোলাৰ বাবে ঐক্যবদ্ধ এখন ঐক্যমঞ্চ গঢ়ি তুলিবলৈ এই আহ্বান জনাইছিল।
সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদে অখিল গগৈৰ এই কথাত যেন সহাৰি জনালে।
সোমবাৰে শ্বহীদ ন্যাসত সদৌ অসম ছাত্ৰ সন্থাৰ নেতৃত্বত বিভিন্ন জাতি আৰু জনগোষ্ঠীয় দল সংগঠনে অব্যাহত ৰখা প্ৰতিবাদী কাৰ্য্যসূচী সন্দৰ্ভত আছু আৰু অসম জাতীয়তাবাদী যুৱ ছাত্ৰ পৰিষদৰ বিষয়ববীয়া সকলে এখন ৰুদ্ধদ্বাৰ বৈঠকত অংশগ্ৰহণ কৰে।
এই সভাতে সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদে সামূহিক সংগ্ৰামী মঞ্চ গঠন কৰাৰ সিদ্ধান্ত গ্ৰহণ কৰে। কা বিৰোধী আন্দোলনক সংগঠিত কৰাৰ বাবে এই মঞ্চ গঠনৰ সিদ্ধান্ত গ্ৰহণ কৰা হয়।
২৩ মাৰ্চত কেন্দ্ৰীয়ভাৱে সামূহিক সংগ্ৰামী মঞ্চ গঠনৰ লগতে উক্ত দিনাই সামূহিক সংগ্ৰামী মঞ্চৰ নাম ঘোষণা কৰা হ’ব বুলি জানিবলৈ দিয়ে আছু আৰু অ.জা.যু.ছা.পৰ নেতৃত্বই।
কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে মুকলি চিঠিত উল্লেখ কৰিছিল, ‘‘যদিহে সর্বশেষত সদৌ অসম ছাত্র সন্থাই কৃষক মুক্তি সংগ্রাম সমিতিৰ লগত ঐক্যৱদ্ধ সংগ্রামৰ বাবে প্রস্তুত নহয় তেন্তে কৃষক মুক্তি সংগ্রাম সমিতিক বাদ দি হ’লেও জাতীয় ঐক্যমঞ্চ গটি তুলি এক শক্তিশালী, ধাৰাবাহিক আৰু চৰকাৰক বাধ্য কৰিব পৰা আন্দোলন গঢ়ি তুলিবলৈ আমি সকলোকে আহ্বান জনালো।’’
‘‘আমি কৃষক মুক্তি সংগ্রাম সমিতিয়ে যিকোনো ত্যাগৰ বিনিময়ত আজিৰ এই সংকটৰ মুহর্তত জাতীয় ঐক্যমঞ্চ গঢ়ি তোলাটো বিচাৰো,’’ অখিল গগৈয়ে কাৰাগাৰৰ পৰা লিখা পত্ৰত এনেদৰে লগতে উল্লেখ কৰিছিল।