‘‘প্ৰেমৰ বাবে হত্যাকাণ্ড, নে আন ৰহস্য?’’ ৰাজা ৰঘুবংশী হত্যা কাণ্ড সন্দৰ্ভত প্ৰশ্ন উত্থাপন ভ্রাতৃ বিপিনৰ

মেঘালয়ত ফুৰিবলৈ অহি সন্ধানহীন হৈ পৰা আৰু পাছত মৃত অৱস্থাত উদ্ধাৰ হোৱা ৰাজা ৰঘুবংশীৰ হত্যা কাণ্ডক লৈ উদয় হৈছে কিছু নতুন প্ৰশ্ন। ৰাজাৰ ভ্ৰাতৃ বিপিন ৰঘুবংশীয়ে সংবাদ সংস্থা এনআইৰ অগত দিয়া সাক্ষাৎকাৰত কয় যে ‘ৰাজ কুশৱাহাই ইচ্ছা কৰিলে সোণমক লৈ আগতে পলাই যাব পাৰিলেহেঁতেন। কিন্তু তেওঁলোকে মোৰ ভ্রাতৃক কিয় হত্যা কৰিব লগা হ’ল?”

বিপিনৰ এই প্ৰশ্নই আৰক্ষীৰ তদন্তত নতুন পাক আনিছে। যদিও তদন্তকাৰীসকলে এই সকলো দিশৰ প্ৰতি লক্ষ্য ৰাখি তেওঁলোকে ৰাজাক হত্যা কৰাৰ প্ৰকৃত কাৰণ বিচাৰি তদন্ত অব্যাহত ৰাখিছে।

শনিবাৰে আৰক্ষীয়ে অভিযুক্ত সোণম আৰু তেওঁৰ প্ৰেমিক ৰাজক শ্বিলং আদালতত হাজিৰ কৰে। আদালতে দুয়োৰে ১৩ দিনৰ ন্যায়িক জিম্মাৰ নিৰ্দেশ দিয়ে। আৰক্ষীৰ সন্দেহ অনুসৰি এইটো এক পৰিকল্পিত হত্যাকাণ্ড যাৰ বাবে তিনিজন ছুপাৰী কিলাৰক দায়িত্ব দিছিল।

বিপিন ৰঘুবংশীয়ে সন্দেহ প্ৰকাশ কৰি কয় – ‘‘এই হত্যাকাণ্ড কেৱল প্ৰেম-সম্পৰ্কীয় হ’ব পাৰে বুলি মই নাভাবো। ইয়াৰ পিচত আন এক গভীৰ ৰহস্য আছে। সেই ৰহস্য উদঘাটনৰ বাবে সোণম আৰু ৰাজৰ নাৰ্কো টেষ্ট কৰাটো অত্যন্ত প্ৰয়োজন।’’

তেওঁ লগতে কয়, ‘‘যদি অভিযুক্তৰ নাৰ্কো টেষ্ট কৰা নহয়, তেন্তে মই উচ্চ ন্যায়ালয় বা উচ্চতম ন্যায়ালয়লৈ যাম।’’

উল্লেখযোগ্য যে, ৰাজা আৰু সোণম ২৩ মে’ত মেঘালয়ত হানিমুনত গৈছিল আৰু তাৰপিছতেই সন্ধানহীন হৈ পৰিছিল। ২ জুনত ৰাজাৰ মৃতদেহ উদ্ধাৰ হয়। ইয়াৰ পিছতেই আৰক্ষীয়ে সোণম, তেওঁৰ প্ৰেমিক ৰাজ আৰু হত্যাকাণ্ডত জড়িত থকা সন্দেহত তিনিজন ছুপাৰী কিলাৰক গ্ৰেপ্তাৰ কৰে।