প্ৰৱঞ্চক সুকেশৰ ২০০ কোটি টকাৰ আত্মসাতৰ গোচৰত ‘চৰকাৰী সাক্ষী’ হ’ব বিচাৰে জেকলিন
সুকেশ চন্দ্ৰশেখৰৰ ২০০ কোটি টকাৰ আৰ্থিক প্ৰতাৰণাৰ গোচৰত এক নাটকীয় মোৰ দেখা গৈছে। এই হাই প্ৰফাইল গোচৰত নিজকে নিৰ্দোষী বুলি প্ৰমাণ কৰিবলৈ আৰু তদন্তত সম্পূৰ্ণ সহযোগিতা আগবঢ়াবলৈ চৰকাৰী সাক্ষী হ’ব বিচাৰি দিল্লীৰ আদালতৰ দ্বাৰস্থ হৈছে বলীউডৰ অভিনেত্ৰী জেকলিন ফাৰ্নাণ্ডেজে।
শেহতীয়াকৈ পাটিয়ালা হাউছ ক’ৰ্টত এই আৱেদন দাখিল কৰি অভিনেত্ৰীগৰাকীয়ে কয় যে গোচৰৰ সত্য উন্মোচন কৰিবলৈ তেওঁ তদন্তকাৰী সংস্থাটোক সকলো প্ৰকাৰে সহায় কৰিবলৈ সাজু।
গোচৰৰ সবিশেষ অনুসৰি মূল অভিযুক্ত সুকেশ চন্দ্ৰশেখৰৰ বিৰুদ্ধে জালিয়াতিৰ জৰিয়তে বিপুল পৰিমাণৰ ধন আত্মসাৎ কৰাৰ অভিযোগ উত্থাপন হৈছে।
বলবৎকাৰী সঞ্চালকালয়ৰ দাবী, সুকেশে নিজৰ অবৈধ আয়ৰ এক বৃহৎ অংশ জেকলিনক বিলাসী উপহাৰ দিয়াৰ বাবে ব্যয় কৰিছিল। এই কাৰণেই ইডিয়ে অভিনেত্ৰীগৰাকীক গোচৰৰ অন্যতম অভিযুক্ত হিচাপে নাম উল্লেখ কৰিছে। অৱশ্যে জেকলিনে দাবী কৰে যে তেওঁ পৰিস্থিতিৰ বলি আৰু এই কেলেংকাৰীৰ বিষয়ে তেওঁৰ কোনো ধাৰণা নাছিল।
আদালতে জেকলিনৰ আবেদনক গুৰুত্বসহকাৰে বিবেচনা কৰাৰ সময়তে তেওঁক আইনী পদ্ধতিৰ কথা সোঁৱৰাই দিয়ে। ন্যায়াধীশগৰাকীয়ে স্পষ্ট কৰি দিয়ে যে চৰকাৰী সাক্ষী হ’বলৈ হ’লে প্ৰথমে নিয়ম অনুসৰি তদন্তকাৰী সংস্থা ইডিত আবেদন কৰিব লাগিব।
ইতিমধ্যে এই প্ৰক্ৰিয়া আৰম্ভ কৰিছে অভিনেত্ৰীগৰাকীয়ে। এতিয়া ইডিয়ে তেওঁৰ বক্তব্য পৰীক্ষা কৰি তেওঁক সাক্ষী হিচাপে গ্ৰহণ কৰা হ’ব নে নহয় সেই কথা আদালতক জনাই দিব।
বিশেষজ্ঞসকলৰ মতে, অৱশেষত যদি জেকলিন চৰকাৰী সাক্ষী হয়, তেন্তে সুকেশৰ বিৰুদ্ধে তদন্ত প্ৰক্ৰিয়াই বেলেগ মাত্ৰা লাভ কৰিব। তেওঁ দিয়া তথ্যই এই জটিল আৰ্থিক জালিয়াতিৰ বহু লুকাই থকা দিশ উন্মোচন কৰিব পাৰে, যিটো মূল দোষীক চাপত ৰখাৰ ক্ষেত্ৰত কেন্দ্ৰীয় সংস্থাটোৰ বাবে ট্ৰাম্প কাৰ্ড হৈ পৰিব পাৰে। আদালতৰ পৰৱৰ্তী শুনানিত এই গোচৰৰ ভৱিষ্যত ক’লৈ গৈ আছে সেয়া স্পষ্ট হ’ব।