প্ৰাক্তন কেন্দ্ৰীয় মন্ত্ৰী, বিজেপিৰ অন্যতম প্ৰতিষ্ঠাপক নেতা যশোৱন্ত সিঙৰ পৰলোকপ্ৰাপ্তি

দীৰ্ঘদিন ধৰি অসুস্থ হৈ তকাৰ পাছত প্ৰাক্তন কেন্দ্ৰীয় মন্ত্ৰী তথা ভাৰতীয় জনতা পাৰ্টিৰ অনত্যতম প্ৰতিষ্ঠাপক নেতা যশোৱন্ত সিঙৰ দেওবাৰে ৮২বছৰ বয়সত পৰলোকপ্ৰাপ্তি ঘটিছে।

প্ৰয়াত নেতাগৰাকীৰ মৃত্যুত টুইটাৰত প্ৰধান মন্ত্ৰী নৰেন্দ্ৰ মোদী আৰু প্ৰতিৰক্ষা মন্ত্ৰী ৰাজনাথ সিঙে শোক প্ৰকাশ কৰিছে।

২০১৪চনৰ ৭ আগষ্টত নিজৰ ঘৰৰ টয়লেটত পৰি গৈ জ্ঞান হেৰুৱাইছিল বৰ্ষীয়ান নেতাগৰাকীয়ে। হাস্পাতললৈ লৈ যোৱা হৈছিল যদিও তেওঁ ক’মাত গুচি গৈছিল।

চিকিৎসকৰ আপ্ৰাণ চেষ্টা সত্ত্বেও তেওঁক স্বাভাৱিক অৱস্থালৈ ঘুৰাই আনিব পৰা নগ’ল। অৱশেষত দেওবাৰে তেওঁৰ বিয়োগ ঘটে।

১৯৩৮চনৰ ৩জানুৱাৰিত ৰাজস্থানৰ বাৰমেৰ জিলাৰ জসোল গাঁৱৰ এক ৰাজপুত পৰিয়ালত যশোৱন্ত সিঙৰ জন্ম হৈছিল।

সুদীৰ্ঘ দিন সেনাবাহিনীত চাকৰি কৰাৰ পাছত তেওঁ ৰাজনীতিত যোগদান কৰিছিল।

বিজেপিৰ অন্যতম প্ৰতিষ্ঠাপক সদস্যগৰাকী দেশৰ সৰ্বাধিককাল সাংসদ হোৱাসকলৰ ভিতৰত অন্যতম আছিল।

১৯৮০ চনৰ পৰা ২০১৪ চনলৈকে তেওঁ সংসদত সক্ৰিয় হৈ আছিল।

প্ৰাক্তন প্ৰধান মন্ত্ৰী  অটল বিহাৰী বাজপেয়ী মন্ত্ৰীসভাত তেওঁ একাধিক গুৰুত্বপূৰ্ণ বিভাগৰ দায়িত্ব লাভ কৰিছিল। তাৰ ভিতৰত বিত্ত, বৈদেশিক আৰু প্ৰতিৰক্ষা মন্ত্ৰ্যালয়ৰ দায়িত্ব আছিল অন্যতম।

১৯৯৮-৯৯বৰ্ষত তেওঁ পৰিকল্পনা আয়োগৰ উপাধ্যক্ষ হিচাপেও কাৰ্যনিৰ্বাহ কৰিছিল। ২০০৪চনত বিজেপিৰ হাতৰ পৰা কেন্দ্ৰৰ ক্ষমতা গুচি যোৱাৰ পাছত তেওঁ ৰাজ্যসভাত বিৰোধী দলৰ নেতা হিচাপে দায়িত্ব পালন কৰিছিল।

উল্লেখ্য যে ২০০৯চনত তেওঁ লিখা এখন গ্ৰন্থত পাকিস্তানৰ জন্মদাতা মহম্মদ আলী জিন্নাৰ প্ৰতি সহানুভূতিসূচক মন্তব্য কৰাৰ বাবে নিজ দলতে তেওঁ অপ্ৰিয় হৈ পৰে। তেওঁ নিজৰ সেই বক্তব্য প্ৰত্যাহাৰ কৰিবলৈ মান্তি নোহোৱাৰ বাবে দলে তেওঁক প্ৰায় একাষৰীয়া কৰি ৰাখে।

২০১৪চনৰ লোকসভা নিৰ্বাচনত তেওঁক বিজেপিয়ে প্ৰাৰ্থিত্ব দিয়া নাছিল। কিন্তু তেওঁ নিৰ্দলীয় প্ৰাৰ্থী হিচাপে বাৰমেৰৰ পৰা প্ৰতিদ্বন্দ্বিতা কৰাৰ সিদ্ধান্ত লৈছিল।

দলে তেওঁ মনোনয়ন পত্ৰ প্ৰত্যাহাৰ কৰাৰ বাবে দিয়া নিৰ্দেশ অমান্য কৰাত ২০১৪চনৰ ২৯ মাৰ্চত তেওঁক বিজেপিৰ পৰা বহিস্কাৰ কৰা হয়।

দেওবাৰে পুৱাই এইগৰাকী প্ৰাজ্ঞ তথা ভীষ্মপুৰুষে ইহলোকৰ পৰা পৰলোকলৈ গমন কৰে।