মৃতদেহৰ পৰা গহনা চুৰি : দিল্লীত বিজেপি নেতাৰ হাস্পতালত লজ্জাজনক ঘটনা

দিল্লীৰ কৃষ্ণা নগৰস্থিত এখন ব্যক্তিগত হাস্পতালত এগৰাকী মৃত মহিলাৰ দেহৰ পৰা সোণৰ অলংকাৰ চুৰি হোৱাৰ এক চাঞ্চল্যকৰ ঘটনা পোহৰলৈ আহিছে। হাস্পতালৰ কৰ্মচাৰী জড়িত থকা এই কাণ্ডৰ ফুটেজ চিচিটিভি কেমেৰাত বন্দী হৈছে, যিয়ে সমাজত এক লজ্জাজনক উদাহৰণ দাঙি ধৰিছে।

যোৱা ১১ নৱেম্বৰৰ পুৱা প্ৰায় ৫ বজাত সংকটজনক অৱস্থাত এগৰাকী বয়স্ক মহিলাক দিল্লীৰ গোৱেল হাস্পতালত ভৰ্তি কৰোৱা হৈছিল।

পৰিয়ালৰ লোকে জনোৱা মতে, প্ৰাৰম্ভিক চিকিৎসাৰ সময়ত মহিলাগৰাকীৰ কাণফুলি আৰু অন্যান্য সোণৰ অলংকাৰ ঠিকেই আছিল। কিন্তু, সেইদিনা সন্ধিয়া প্ৰায় ৫.৪৫ বজাত মহিলাগৰাকীৰ স্বাস্থ্য অতি সংকটজনক হোৱাত তেওঁক জিটিবি হাস্পতাললৈ প্ৰেৰণৰ নিৰ্দেশ দিয়া হয়। জিটিবি হাস্পতাললৈ নিয়াৰ পথতে তেওঁৰ মৃত্যু হয়। মৃতদেহটো নিয়াৰ সময়তে পৰিয়ালৰ লোকে দেখে যে মহিলাগৰাকীৰ কাণফুলিযোৰ নাই।

পৰিয়ালৰ লোকে হাস্পতাল কৰ্তৃপক্ষক এই বিষয়ে সোধাত তেওঁলোকে কোনো স্পষ্ট উত্তৰ দিব নোৱাৰিলে। ১২ নৱেম্বৰত পৰিয়ালে আৰক্ষীক লিখিত অভিযোগ দিয়ে যদিও আৰক্ষীয়ে গোচৰ পঞ্জীয়ন কৰাত আগ্ৰহ নেদেখুৱালে বুলি অভিযোগ উত্থাপন হৈছে। আৰক্ষীয়ে এই কামৰ বাবে সময় নাই বুলি জনাইছিল বুলি পৰিয়ালৰ লোকে দাবী কৰিছে।

পৰিয়ালৰ লোকে তাৰ পাছত হাস্পতালৰ চিচিটিভি ফুটেজ পৰীক্ষা কৰাৰ দাবী জনায়। ফুটেজ পৰীক্ষা কৰাত দেখা যায় যে হাস্পতালৰে এগৰাকী মহিলা কৰ্মীয়ে মৃত মহিলাগৰাকীৰ দেহৰ পৰা গহনা চুৰি কৰিছিল।

চিচিটিভিৰ প্ৰমাণ পোৱাৰ পাছতহে আৰক্ষীয়ে এই গোচৰটো পঞ্জীয়ন কৰে।

এই ঘটনা ভাইৰেল হোৱাৰ পাছতে হাস্পতাল কৰ্তৃপক্ষই চুৰিকাণ্ডত জড়িত মহিলা কৰ্মীগৰাকীক বৰ্খাস্ত কৰা বুলি জনাইছে।

এখন ব্যক্তিগত হাস্পতালৰ ভিতৰত মৃতদেহৰ গহনা চুৰি হোৱা এই নিকৃষ্ট কাণ্ডই হাস্পতালৰ কৰ্মচাৰীৰ নৈতিকতা আৰু নিৰাপত্তাক লৈ গুৰুতৰ প্ৰশ্ন উত্থাপন কৰিছে।