স্তন ডাঙৰ হৈ যোৱা মাৰ্কিন যুৱকক ৫৭ হাজাৰ কোটি টকা জৰিমনা আদায়ৰ নিৰ্দেশ J&Jক
জনছন এন্দ জনছনৰ প্ৰতীক। ছবি সৌজন্য-- ৱিকিমিদিয়া কমনছ।
জনছন এন্দ জনছনক স্তন আকাৰ বৃদ্ধিকাৰী পাৰ্শ্বক্ৰিয়াযুক্ত দৰৱজনিত এক গোচৰত জৰিমনাৰূপে এজন এমেৰিকান যুৱকক প্ৰায় ৫,৬৭,২০,০০,০০,০০০ (৮ বিলিয়ন ইউ এছ ডলাৰ) টকা আদায় দিয়াৰ নিৰ্দেশ দিছে।
ফিলাদেলফিয়াৰ এখন আদালতে শেহতীয়াকৈ এমেৰিকান অতিকায় বহুজাতিক কোম্পানিটোক নিকলাছ মুৰে’ নামৰ যুৱকজনক এই জৰিমনা দিয়াৰ নিৰ্দেশ দিছে।
বাতৰি মতে, ২৬ বছৰীয়া মুৰেই কোম্পানিটোৰ Risperdal নামৰ এণ্টি-চাইক’টিক দৰৱবিধ ব্যৱহাৰ কৰিছিল।
কিন্তু, পিছত তেওঁ অভিযোগ তৰে যে দৰৱবিধৰ স্তন বৃদ্ধিকাৰী পাৰ্শ্বক্ৰিয়া সম্পৰ্কে জনছন এন্দ জনছনে সবিশেষ সদৰী কৰা নাছিল।
কোম্পানিটোৱে “ৰোগীতকৈ মুনাফা ডাঙৰ” নীতি লোৱা বুলি যুৱকজনৰ অধিবক্তাই আদালতত যুক্তি প্ৰদৰ্শন কৰে।
জৰিমনাৰ দণ্ডক “সম্পূৰ্ণৰূপে অসমানুপাতিক”ৰূপে অভিহিত কৰি জনছন এন্দ জনছনে এতিয়া উচ্চতৰ আদালতৰ দ্বাৰস্থ হোৱাৰ সিদ্ধান্ত গ্ৰহণ কৰিছে।