সভালৈ মাতি সাংবাদিকক অপমান বিজেপিৰ; সভাগৃহৰ পৰা উলিয়াই দিলে সাংবাদিকক

বিজেপিৰ ৰাজহুৱা সভাত নিষিদ্ধ সংবাদ মাধ্যম। সভালৈ মাতি অপমান সাংবাদিকক। বন্তি প্ৰজ্বলন, মাতৃ বন্দনা, আৰু সম্বৰ্ধনা অনুষ্ঠানৰ পাছতে সভা গৃহৰ পৰা উলিয়াই দিয়া হয় সাংবাদিক সকলক।

আজি মণ্ডল আৰু জিলা বিজেপি সভাপতিৰ সন্মিলন আছিল শংকৰদেৱ কলাক্ষেত্ৰৰ শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত। এই অনুষ্ঠানৰ উদ্বোধনৰ দায়িত্বত আছিল মুখ্য মন্ত্ৰী সৰ্বানন্দ সোণোৱাল।

এই উদ্দেশ্যে টেলিভিছন, ছপা মাধ্যম আৰু ৱেবৰ সকলো মাধ্যমৰে সাংবাদিকক এই অনুষ্ঠানৰ বাতৰি সংগ্ৰহৰ বাবে আহ্বান জনাইছিল।

কিন্তু মুখ্য মন্ত্ৰী সৰ্বানন্দ সোণোৱাল, বিজেপিৰ ৰাজ্যিক সভাপতি ৰঞ্জিত দাস, সাংগঠনিক সাধাৰণ সম্পাদক ফণীন্দ্ৰ নাথ শৰ্মা আৰু মন্ত্ৰী নৱ দলেক সম্বৰ্ধনা জনোৱাৰ পাছতে সাংবাদিক সকলক সভা গৃহ ত্যাগ কৰিবলৈ কোৱা হয়।

সভাৰ অন্তত সাংবাদিক সকলক সন্মিলনৰ বিষয়ে জনোৱা হ’ব বুলি ঘোষণা কৰে ঘোষকৰ দায়িত্বত থকা মুখপাত্ৰ পুলক বৰগোহাঁইয়ে।

এনেদৰে সভালৈ মাতি অপমান কৰাত সভাত উপস্থিত সাংবাদিকসকল ক্ষোভিত হৈ পৰে।

“এনেকুৱা হ’লে আমাক নিমন্ত্ৰণ দিব নালাগিছিল। নিমন্ত্ৰণ দিয়াৰ বাবে আহিছিলো।” ক্ষোভিত এজন সাংবাদিকৰ মন্তব্য।

আন এজন সাংবাদিকে কয় “সভাৰ পিছত যদি সংবাদ মাধ্যমক সম্বোধন কৰে তেন্তে আমাক জনাব লাগিছিল। আমাৰ অন্য কাম থাকেটো।”

উল্লেখযোগ্য যে পূৰ্বেও এনেদৰে মণ্ডল আৰু জিলা সভাপতিৰ সন্মিলন অনুষ্ঠিত হৈছিল, য’ত সংবাদমাধ্যমক বাতৰি সংগ্ৰহৰ বাবে দিয়া হৈছিল।

কিন্তু বৰ্তমান পৰিস্থিতিত নাগৰিকত্ব সংশোধনী বিধেয়কৰ বিৰুদ্ধে ৰাজ্যজুৰি উত্তাল প্ৰতিবাদ বা ক্ষোভৰ জুই সংবাদ মাধ্যমত প্ৰচাৰ হোৱাত শংকিত হৈ পৰিছে শাসনাধিস্থ বিজেপি।