নুপূৰ শৰ্মাই হজৰত মহম্মদৰ বিৰুদ্ধে কৰা মন্তব্যৰ ভিডিঅ’ প্ৰথমে চিনাক্ত কৰা অল্টনিউজৰ সাংবাদিক মহম্মদ জুবেইৰক গ্ৰেপ্তাৰ
তথ্য পৰীক্ষণৰ জৰিয়তে শাসনাধিষ্ঠিত বিজেপি চৰকাৰৰ বহু ভুৱা প্ৰচাৰৰ মুখা খুলি দিয়া অল্টনিউজৰ অন্যতম প্ৰতিষ্ঠাপক সাংবাদিক মহম্মদ জুবেইৰক গ্ৰেপ্তাৰ কৰা হৈছে।
ছ’চিয়েল মিডিয়াৰ তথ্য পৰীক্ষা কৰা ৱেবছাইট অল্টনিউজৰ অন্যতম প্ৰতিষ্ঠাপক সাংবাদিক মহম্মদ জুবেইৰক আজি দিল্লী আৰক্ষীয়ে ধৰ্মীয় আৱেগত আঘাত কৰা আৰু শত্ৰুতা বৃদ্ধি কৰাৰ অভিযোগত গ্ৰেপ্তাৰ কৰে।
অল্টনিউজৰ সহ-প্ৰতিষ্ঠাপক প্ৰতীক সিনহাই কয় যে মহম্মদ জুবেইৰক এটা বেলেগ গোচৰত সোধা-পোছাৰ বাবে দিল্লীলৈ মাতি অনা হৈছিল। কিন্তু শেষত তেওঁক গ্ৰেপ্তাৰ কৰা হয়।
তেওঁক কোনো গ্ৰেপ্তাৰৰ জাননী দিয়া হোৱা নাছিল বুলিও সিনহাই অভিযোগ কৰে। টুইটত সিনহাই কয়, “বাৰে বাৰে অনুৰোধ কৰাৰ পিছতো আমাক কোনো এজাহাৰৰ প্ৰতিলিপি দিয়া হোৱা নাই।” আৰক্ষীয়ে অৱশ্যে কৈছে যে জুবেইৰে আৰক্ষী থানাত পঞ্জীয়ন কৰা এটা গোচৰৰ তদন্ত সন্দৰ্ভত থানাত উপস্থিত হৈছিল।
তেওঁক আৰক্ষীয়ে সোধা-পোছা কৰি আছে আৰু কাইলৈ তেওঁক দণ্ডাধীশৰ সন্মুখত হাজিৰ কৰোৱা হ’ব। কংগ্ৰেছ নেতা শশী থাৰুৰে তেওঁৰ গ্ৰেপ্তাৰক “সত্যৰ ওপৰত আক্ৰমণ” বুলি অভিহিত কৰিছে, আৰু তেওঁৰ মুক্তিৰ দাবী উত্থাপন কৰিছে।২০১৭ চনত এক অলাভজনক প্ৰতিষ্ঠান হিচাপে প্ৰতিষ্ঠা হোৱা অল্টনিউজ হৈছে বিশ্বৰ আটাইতকৈ এক পৰিচিত তথ্য পৰীক্ষণ কৰা মিডিয়া।
প্ৰতিষ্ঠানটোৰ প্ৰতিষ্ঠাপকসকলে বছৰ বছৰ ধৰি সোঁপন্থী গোটবোৰৰ দ্বাৰা অনলাইন ট্ৰলিং আৰু আৰক্ষীৰ হালাশাস্তিৰ সন্মুখীন হৈ অহাৰ অভিযোগ উঠি আহিছে। মহম্মদ জুবেইৰৰ বিৰুদ্ধে শেহতীয়াকৈ এটা গোচৰ এমাহ আগতে উত্তৰ প্ৰদেশৰ সীতাপুৰ জিলাত ৰুজু কৰা হৈছিল।
সেই অভিযোগৰ ভিত্তিতে তেওঁক দিল্লীত গ্ৰেপ্তাৰ কৰা বুলি ধাৰণা কৰা হৈছে। আইনজীৱী প্ৰশান্ত ভূষণে তেওঁৰ গ্ৰেপ্তাৰ সন্দৰ্ভত প্ৰতিক্ৰিয়া ব্যক্ত কৰি কয় “যিসকলে ঘৃণামূলক ভাষণ দিছে তেওঁলোককলৈয়েই এই চৰকাৰ চলি আছে।” সাংবাদিকগৰাকীৰ গ্ৰেপ্তাৰৰ বিৰুদ্ধে আন বহু বিশিষ্ট ব্যক্তিয়ে প্ৰতিবাদ কৰিছে।
উল্লেখ্য নুপূৰ শৰ্মাই পয়গম্বৰ হজৰত মহম্মদৰ বিৰুদ্ধে কৰা মন্তব্যৰ ভিডিঅ’ প্ৰথমে সাংবাদিক জুবেইৰেই ফেক্ট চেকিঙৰ জৰিয়তে ৰাজহুৱা কৰিছিল।