#MeToo: প্ৰাক্তন মন্ত্ৰী এম জে আকবৰে তৰা মানহানিৰ গোচৰত দোষমুক্ত প্ৰিয়া ৰমানি
প্ৰাক্তন কেন্দ্ৰীয় মন্ত্ৰী এম জে আকবৰে যৌন আতিশয্যৰ অভিযোগ তোলা সাংবাদিক প্ৰিয়া ৰমানিৰ বিৰুদ্ধে যি মানহানি গোচৰ তৰিছিল সেই গোচৰত আদালতে আজি প্ৰিয়া ৰোমানিক দোষমুক্ত ঘোষণা কৰে।
উল্লেখ্য ২০১৮ চনত দেশজুৰি চৰ্চা লাভ কৰিছিল #MeToo আন্দোলনে।ছ’চিয়েল মিডিয়াৰ জৰিয়তে জনপ্ৰিয়তা লাভ কৰা #MeToo আন্দোলনৰ জৰিয়তে ৰাজনীতি, সংবাদমাধ্যম, চিনেমা আদি সকলো ক্ষেত্ৰৰ সৈতে জৰিত বহু নাৰীয়ে খুলি দিছিল বহু সম্ভ্ৰান্ত পুৰুষৰ মুখা।
সেই সময়তে সাংবাদিক প্ৰিয়া ৰমানিয়ে এইবুলি অভিযোগ কৰিছিল যে ২০ বছৰ আগতে তেওঁক এম জে আকবৰে চুম্বন কৰিব বিচাৰিছিল।
সেই সময়ত আকবৰ এছিয়ান এজ কাকতৰ সম্পাদক আছিল। প্ৰিয়া ৰমানিয়ে এনে অভিযোগ উত্থাপন কৰাৰ পিছতে আন কুৰি গৰাকী মহিলা-যুৱতীয়েও আকবৰৰ বিৰুদ্ধে যৌন শোষণৰ অভিযোগ তুলিছিল।
উপায়হীন হৈ প্ৰাক্তন কেন্দ্ৰীয় মন্ত্ৰী এম জে আকবৰে প্ৰিয়া ৰমানিৰ বিৰুদ্ধে মানহানিৰ গোচৰ তৰিছিল।
উক্ত গোচৰ সন্দৰ্ভত আজি দিল্লীৰ মেট্ৰ’পলিটান আদালতৰ ন্যায়াধীশ ৰবীন্দ্ৰ কুমাৰ পাণ্ডেই কয় যে যৌন আতিশয্যৰ অভিযোগ কৰাৰ অধিকাৰ প্ৰত্যেক মহিলাৰে আছে। এই ক্ষেত্ৰত প্ৰিয়া ৰমানিয়ে একো ভুল কৰা নাই।সেয়ে তেওঁক গোচৰটোত দোষমুক্ত ঘোষণা কৰা হয়।
উল্লেখ্য মোদীৰ চৰকাৰৰ প্ৰাক্তন বিদেশ মন্ত্ৰী এম জে আকবৰৰ বিৰুদ্ধে প্ৰিয়া ৰমানিয়ে যৌন আতিশয্যৰ অভিযোগ তোলাৰ পিছতে আকবৰে মন্ত্ৰী পদৰ পৰা পদত্যাগ কৰিবলৈ বাধ্য হৈছিল ।
তেওঁক এডিটৰ্ছ গীল্ডৰ পৰাও নিলম্বিত কৰা হৈছিল।