পদচ্যুত হ’ব ৩০ দিন কাৰাবাসী নেতা: নতুন বিধেয়ক পৰীক্ষণৰ বাবে জেপিচি গঠন

সংসদৰ আগন্তুক শীতকালীন অধিৱেশনৰ পূৰ্বে লোকসভাৰ অধ্যক্ষ ওম বিৰলাই বুধবাৰে ৩১ জনীয়া যুটীয়া সংসদীয় সমিতিৰ (জেপিচি) অনুমোদন জনাইছে। এই সমিতিৰ নেতৃত্ব বহন কৰিব ভুবনেশ্বৰৰ বিজেপি সাংসদ অপৰাজিতা সাৰংগীয়ে।

এই গুৰুত্বপূৰ্ণ জেপিচিখন ২০ আগষ্টত উত্থাপন কৰা তিনিখন নতুন বিধেয়ক পৰীক্ষা কৰিবলৈ গঠন কৰা হৈছে, যাৰ ভিতৰত এখন সংবিধান সংশোধনী বিধেয়কো আছে। এই বিধেয়কসমূহে এক বিতৰ্কিত প্ৰস্তাৱ আগবঢ়াইছে। পাঁচ বছৰৰো অধিক কাৰাদণ্ডৰ যোগ্য গুৰুতৰ অপৰাধত গ্ৰেপ্তাৰ হৈ একেৰাহে ৩০ দিন কাৰাবাসী হ‘লে, প্ৰধানমন্ত্ৰী, মুখ্যমন্ত্ৰী আৰু কেন্দ্ৰীয় মন্ত্ৰীসকল তেওঁলোকৰ পদৰ পৰা অপসাৰিত হ‘ব। বুধবাৰে লোকসভা সচিবালয়ে অপৰাজিতা সাৰংগীক জেপিচিৰ অধ্যক্ষ হিচাপে নিযুক্তি দিয়াৰ আনুষ্ঠানিক বিজ্ঞপ্তি জাৰি কৰে।

এই বিধেয়কসমূহক লৈ দেশৰ ৰাজনীতিত তীব্ৰ বিতৰ্কৰ সৃষ্টি হৈছে। কংগ্ৰেছ, তৃণমূল কংগ্ৰেছ আৰু সমাজবাদী পাৰ্টিৰ দৰে মুখ্য বিৰোধী দলসমূহে এই বিধেয়কক বিৰোধী শাসিত ৰাজ্যক অস্থিৰ কৰাৰ ‘ৰাজনৈতিক ষড়যন্ত্ৰ’ বুলি অভিহিত কৰি জেপিচি বৰ্জনৰ সিদ্ধান্ত লৈছে।

তৃণমূল কংগ্ৰেছে সৰ্বপ্ৰথমে জেপিচি বৰ্জনৰ কথা ঘোষণা কৰি লোকসভাত ১৩০ নং সংবিধান সংশোধনী বিধেয়কৰো বিৰোধিতা কৰিছিল। সমাজবাদী পাৰ্টিয়েও জেপিচিত যোগ নিদিয়ে বুলি স্পষ্ট কৰি দিছে।

বৰ্তমান জেপিচিত মুঠ ৩১ জন সদস্য আছে। লোকসভাৰ ২১ জন আৰু ৰাজ্যসভাৰ ১০ জন। বিৰোধীয়ে বৰ্জন কৰাৰ ফলত, শাসকীয় এনডিএৰ সংখ্যাগৰিষ্ঠতাৰ মাজত এই সমিতিয়ে কাম কৰিব। বৰ্তমানলৈকে বিৰোধীৰ পৰা কেৱল এমআইএম (অৱৈসী) আৰু ৱাইএছআৰ কংগ্ৰেছে এই জেপিচিত যোগদান কৰিছে।

বিৰোধী নেতাসকলে দাবী কৰিছে যে, এই বিধেয়কৰ জৰিয়তে বিৰোধী মুখ্যমন্ত্ৰীসকলক গ্ৰেপ্তাৰ কৰি ক্ষমতাৰ পৰা অপসাৰিত কৰাৰ চেষ্টা চলিব। তেওঁলোকে সন্দেহ প্ৰকাশ কৰিছে যে, বিজেপিয়ে নিজৰ প্ৰতিদ্বন্দ্বীসকলৰ বিৰুদ্ধে চিবিআই আৰু ইডিৰ দৰে কেন্দ্ৰীয় সংস্থাসমূহক অপব্যৱহাৰ কৰিব পাৰে।

বিৰোধীয়ে এইবুলিও মন্তব্য কৰে যে, “কোনো সংস্থাই প্ৰধানমন্ত্ৰীক গ্ৰেপ্তাৰ নকৰে,” যাৰ দ্বাৰা তেওঁলোকে বুজাব বিচাৰিছে যে এই বিধেয়ক কেৱল বিৰোধী নেতাসকলক লক্ষ্য কৰি লোৱা হৈছে।

এছ‘চিয়েচন ফৰ ডেম‘ক্ৰেটিক ৰিফৰ্মছ (ADR) ৰ প্ৰতিবেদন অনুসৰি, বৰ্তমান ৩০ গৰাকী মুখ্যমন্ত্ৰীৰ ভিতৰত ১২ জনৰ বিৰুদ্ধে অপৰাধমূলক গোচৰ আছে। সৰ্বাধিক গোচৰ থকা মুখ্যমন্ত্ৰীসকলৰ ভিতৰত আছে কংগ্ৰেছৰ ৰেৱান্ত ৰেড্ডী (তেলেংগানা), এনডিএৰ মিত্ৰ চন্দ্ৰবাবু নাইডু (আন্ধ্ৰ প্ৰদেশ) আৰু ডিএমকেৰ এম কে ষ্টালিন (তামিলনাডু)।

বিৰোধী নেতাসকলৰ মতে, বিজেপিয়ে নিজৰ প্ৰতিদ্বন্দ্বীৰ বিৰুদ্ধে চিবিআই-ইডি ব্যৱহাৰ কৰি অহাৰ পিছত এতিয়া এই বিধেয়ক আনি এটা ‘স্বচ্ছ ভাবমূৰ্তি’ দেখুৱাবলৈ চেষ্টা কৰিছে।