কলগাছিয়াত আৰক্ষীৰ অভিযানত আটক দুই জাল নোট ব্যৱসায়ী; জব্দ মেচিন, ২.৫ লাখ টকা

বৰপেটা জিলাৰ কলগাছিয়াত আৰক্ষীয়ে মঙলবাৰে নিশা এক অভিযান চলাই জাল নোট ছপা কৰা ঘাটি উচ্ছেদ কৰে। লগতে আৰক্ষীয়ে অভিযান কালত জাল নোট ছপোৱা মেচিন, ২.৫ লাখ জাল নোটসহ দুজন যুৱককো আটক কৰিবলৈ সক্ষম হয়।

উল্লেখযোগ্য যে গোৱালপাৰা জিলাৰ বাপুজিনগৰৰ শংকৰ বিশ্বাসৰ পুত্ৰ সুদীপ বিশ্বাস আৰু বঙাইগাঁও জিলাৰ শিমলাবাৰীৰ অমৰ আলীৰ পুত্ৰ চফিকুল ইছলাম দুয়ো মিলি কলগাছিয়া আৰক্ষী থানাৰ পৰা মাত্ৰ ১০০ মিটাৰ দূৰত্বত ভাড়া ঘৰলৈ এমাহ ধৰি জাল নটো ছপা কৰি আছিল।

প্ৰাপ্ত তথ্য মতে দুই যুৱকে ইউটিউবৰ পৰা জাল নোট ছপা কৰাৰ ভিডিঅ’ চাই প্ৰশিক্ষণ লাভ কৰি ৫০, ১০০, ২০০ টকাৰ মুঠ ২.৫ লাখ জাল নোট ছপা কৰিছিল।

মন কৰিব লগীয়া যে আটকাধীন চফিকুল ইছলাম নামৰ যুৱকজন কলগাছিয়াস্থিত নৱজ্যোতি মহাবিদ্যালয়ৰ পদাৰ্থ বিজ্ঞান বিভাগৰ তৃতীয় ষান্মাষিকৰ মেধাৱী ছাত্ৰ।

ইফালে আৰক্ষীয়ে বৰ্তমান আটকাধীন দুই যুৱককে জেৰা অব্যাহত ৰাখিছে বুলি আৰক্ষী সূত্ৰৰ পৰা জানিব পৰা গৈছে।