‘মই প্ৰপাগাণ্ডামূলক ছবিৰ বিৰোধী’: দ্য কেৰেলা ষ্ট’ৰীক লৈ প্ৰতিক্ৰিয়া কমল হাছানৰ

দ্য কেৰেলা ষ্ট’ৰী- যোৱা ৫ মে’ত চিনেমা হলত মুক্তি লাভ কৰে বলীউডৰ এই ছবিখনে। সুদীপ্ত সেনৰ পৰিচালনাত নিৰ্মিত এই ছবিখন মুক্তিৰ পূৰ্বেই সোমাই পৰিছিল বিতৰ্কত।

ছবিখনৰ দ্বাৰা মূলত: বাঁওপন্থী শাসিত ৰাজ্য কেৰেলাৰ বিপক্ষে অপপ্ৰচাৰ চলোৱা বুলি তীব্ৰ বিতৰ্কৰ সৃষ্টি হৈছিল। মুক্তিৰ পিছত আনকি ভাৰতৰ কিছুমান ৰাজ্যতো ছবিখন নিষিদ্ধ কৰা হৈছিল।

অৱশ্যে এই বিতৰ্কৰ মাজতো বক্স অফিচত কিছু পৰিমাণে সফলতা অৰ্জন কৰিবলৈ সক্ষম হৈছে ছবিখনে। সমান্তৰালভাৱে বিজেপি শাসিত ৰাজ্যসমূহত ছবিখনে চৰকাৰী সমৰ্থন লাভ কৰাও দেখিবলৈ পোৱা গৈছে।

দ্য কেৰেলা ষ্ট’ৰীক লৈ সৃষ্টি হোৱা এনে বিতৰ্কৰ মাজতে প্ৰতিক্ৰিয়া প্ৰকাশ কৰিছে দক্ষিণৰ চুপাৰষ্টাৰ তথা ভাৰতীয় চিনেমা জগতৰ অন্যতম এগৰাকী আগশাৰীৰ অভিনেতা কমল হাছানে।

এক আছুতীয়া সাক্ষাৎকাৰত অভিনেতাগৰাকীয়ে দ্য কেৰেলা ষ্ট’ৰীক প্ৰপাগাণ্ডামূলক ছবি আখ্যা দিয়ে।

কমল হাছানে সাক্ষাৎকাৰটোত কয়, “মই আপোনালোকক জনাইছোৱেই যে মই অপপ্ৰচাৰমূলক ছবিৰ বিৰোধী। তলত ল’গ’ হিচাপে ‘সঁচা কাহিনী’ লিখিলেই যথেষ্ট নহয়। এয়া সঁচাকৈয়ে সঁচা হ’ব লাগিব।”

অভিনেতাগৰাকীয়ে লগতে দ্য কেৰেলা ষ্ট’ৰীক স্পষ্টকৈ সঁচা ঘটনাৰ আলমত নিৰ্মিত নহয় বুলি মন্তব্য কৰে।