ৰাষ্ট্ৰপতি নিৰ্বাচিত হ’লে পুটিনৰ সৈতে শান্তি আলোচনাত নবহে কমলা হেৰিছ, কিন্তু যদি…

যদিহে ৰাষ্ট্ৰপতি নিৰ্বাচিত হয় তেন্তে কমলা হেৰিছে কয় যে তেওঁ ইউক্ৰেইন বিষয়ত শান্তি আলোচনাৰ বাবে ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে সাক্ষাৎ নকৰে। আলোচনা প্ৰক্ৰিয়াত ইউক্ৰেইন পক্ষ হিচাপে অন্তৰ্ভুক্ত নহ’লে তেওঁ পুটিনৰ সৈতে সাক্ষাৎ নকৰে বুলিও কয়।

বৰ্তমান কমলা হেৰিছ আমেৰিকাৰ উপ-ৰাষ্ট্ৰপতি। অহা নৱেম্বৰ মাহত আমেৰিকাৰ ৰাষ্ট্ৰপতি নিৰ্বাচনত তেওঁ ডেম’ক্ৰেটিক পাৰ্টিৰ প্ৰাৰ্থী হিচাপে প্ৰতিদ্বন্দ্বিতা কৰিব। এই নিৰ্বাচনত কমলাই প্ৰাক্তন ৰাষ্ট্ৰপতি তথা ৰিপাব্লিকান প্ৰাৰ্থী ড’নাল্ড ট্ৰাম্পৰ সৈতে প্ৰতিদ্বন্দ্বিতা কৰিব বুলি ধাৰণা কৰা হৈছে।

আমেৰিকাৰ ৰাষ্ট্ৰপতি নিৰ্বাচনৰ পূৰ্বে সোমবাৰে চিবিএছ চেনেল ‘৬০ মিনিটছ’ত এই মন্তব্য কৰে কমলা হেৰিছে। তাত তেওঁক সোধা হৈছিল যে ইউক্ৰেইনৰ যুদ্ধ বন্ধ কৰিবলৈ তেওঁ ৰাছিয়াৰ ৰাষ্ট্ৰপতিক পোনপটীয়াকৈ সাক্ষাৎ কৰিব নেকি?

ইয়াৰ উত্তৰত কমলা হেৰিছে কয় যে ইউক্ৰেইনক বাদ দি এই বিষয়ত কোনো দ্বিপাক্ষিক আলোচনা নহয়। ইউক্ৰেইনক তেওঁলোকৰ ভৱিষ্যতৰ কথা ক’বলৈ আলোচনাত ৰাখিব লাগিব।

ইয়াৰ পূৰ্বে জো বাইডেন প্ৰশাসনে পুটিনৰ সৈতে কোনো ধৰণৰ বৈঠকৰ সম্ভাৱনা নুই কৰিছিল।