ফেইচবুকত অভিনেত্ৰী কংগণা ৰাণাৱটক ধৰ্ষণৰ ভাবুকি এজন অধিবক্তাৰ : কোন এই অধিবক্তা ?

এইবাৰ বলিউদৰ অভিনেত্ৰী কংগণা ৰাণাৱটক ধৰ্ষণৰ ভাবুকি দিলে এজন অধিবক্তাই।

ওড়িশাৰ মেহেন্দি ৰাজা নামৰ এজন অধিবক্তাই এই ভাবুকি প্ৰদান কৰিছে অভিনেত্ৰী গৰাকীক।

যোৱা ১৭ অক্টোবৰত অভিনেত্ৰী কংগণাই ফেইচবুকত দিয়া এটা প’ষ্টত ক’মেন্ট কৰি চহৰৰ মাজ মাজিয়াত অভিনেত্ৰী গৰাকীক ধৰ্ষণৰ ভাবুকি প্ৰদান কৰিছে অধিবক্তা গৰাকীয়ে।

উল্লেখ্য যে যোৱা শনিবাৰে বান্দ্ৰা আদালতে দুই ধৰ্মীয় সম্প্ৰদায়ৰ মাজত ধৰ্মীয় বিদ্বেষ আৰু ঘৃণা বিয়পোৱাৰ অভিযোগত অভিনেত্ৰী কংগণা আৰু ভগ্নী ৰাংগুলী চান্দেলৰ বিৰুদ্ধে এজাহাৰ দাখিলৰ নিৰ্দেশ দিছিল।

কংগণাই পেৰিছৰ ৰাজপথত এজন ইতিহাসৰ শিক্ষকক শিৰচ্ছেদ কৰা ঘটনাৰ জেৰ টানিও সামাজিক মাধ্যমত আপত্তিজনক মন্তব্য কৰা পৰিলক্ষিত হৈছে।

ইফালে কেন্দ্ৰীয় চৰকাৰে শেহতীয়াকৈ সংসদত গৃহীত কৰা কৃষি সংশোধনী আইন বিপক্ষে দেশৰ কৃষকসকলে প্ৰতিবাদ সাব্যস্ত কৰাৰ সময়ত কৃষকসকলক সন্ত্ৰাসবাদী বুলি অভিহিত কৰি সামাজিক মাধ্যমত অতি বিদ্বেষপূৰ্ণ মন্তব্য কৰিছিল অভিনেত্ৰী গৰাকীয়ে।

ইয়াৰ পিছতে কৰ্ণাটকৰ আদালতে অভিনেত্ৰী গৰাকীৰ বিৰুদ্ধেও এজাহাৰ দাখিলৰ নিৰ্দেশ দিছিল।

অভিনেত্ৰী গৰাকীৰ এনেবোৰ মন্তব্যৰ বাবেই দেশত বহুলোক ক্ষুব্ধ হৈ পৰা দেখা গৈছে।

ইফালে ফেইচবুকত অভিনেত্ৰী কংগণাক ধৰ্ষণৰ ভাবুকি দিয়া ওড়িশাৰ অধিবক্তা গৰাকীয়ে ক্ষমা খুজি দাবী কৰিছে যে তেনে ধৰণৰ মন্তব্য তেওঁ দিয়া নাছিল।

তেওঁৰ ফেইচবুক একাউন্টটো কোনো ব্যক্তিয়ে হেক কৰি এনে মন্তব্য দিছে বুলি দাবী কৰি অধিবক্তা গৰাকীয়ে এটা ফেইচবুক প’ষ্টৰ যোগেদি ৰাজহুৱাকৈ ক্ষমা প্ৰাৰ্থনা কৰিছে।