শ’লঠেকত শিলাদিত্য! কৰিমগঞ্জ আদালতৰ গ্ৰেপ্তাৰী পৰোৱানা জাৰি
মুছলমান বিৰোধী তথা সাম্প্ৰদায়িকতাৰে পৰিপূৰ্ণ মন্তব্য কৰি এতিয়া শ’লঠেকত পৰিছে হোজাই সমষ্টিৰ বিজেপি বিধায়ক শিলাদিত্য দেব। কিয়নো বিধায়কজনৰ বিৰুদ্ধে গ্ৰেপ্তাৰী পৰোৱানা জাৰি কৰিছে কৰিমগঞ্জ জিলা দণ্ডাধীশৰ আদালতে।
উল্লেখযোগ্য যে, শিলাদিত্যৰ এই সাম্প্ৰদায়িক মন্তব্যৰ বিৰুদ্ধে কৰিমগঞ্জৰ জুনেইদ আহমেদ নামৰ এগৰাকী প্ৰাক্তন ছাত্ৰ নেতাই কৰিমগঞ্জ আদালতত ১৪৬৫/১৮ নং গোচৰত ভাৰতীয় দণ্ডবিধিৰ ২৯৮/৫০৪/৫০৫(১)(বি)(চি)/৫০৫(২)/২৯৫(এ)/১২১/১১৫ ধাৰত গোচৰ ৰুজু কৰিছিল। তাৰ পাছতে তিনিবাৰকৈ বিধায়কগৰাকীক আদালতত উপস্থিত হ’বৰ বাবে আদালতে নিৰ্দেশ দিছিল।
প্ৰথমবাৰ অৰ্থ্যাৎ ১১ ফেব্ৰুৱাৰিত নিৰ্দেশ দিয়াৰ পাছতো কৰিমগঞ্জৰ জিলা দণ্ডাধীশৰ আদালতত হাজিৰ নোহোৱাত আদালতে যোৱা ২৫ এপ্ৰিলৰ দিনা গুৱাহাটীৰ আৰক্ষী আয়ুক্ত আৰু কৰিমগঞ্জৰ আৰক্ষী অধীক্ষকক বিধায়কগৰাকীক আদালতত হাজিৰ কৰোৱাৰ নিৰ্দেশ দিছিল। তাৰ পাছতো নিজৰ ব্যক্তিগত অসুবিধাৰ অজুহাতত আদালতত উপস্থিত হোৱা নাছিল বিধায়কগৰাকী।
ইয়াৰ পাছত যোৱা ২৮ মে’ৰ দিনা আদালতত উপস্থিত হ’বলৈ নিৰ্দেশ দিছিল যদিও সেইবাৰো শিলাদিত্য দেব আদালতত উপস্থিত হোৱা নাছিল।
শেহতীয়াকৈ আজিও শিলাদিত্য দেব কৰিমগঞ্জ আদালতত উপস্থিত নোহোৱাত কৰিমগঞ্জ জিলা দণ্ডাধীশৰ আদালতে গ্ৰেপ্তাৰী পৰোৱানা জাৰি কৰে বুলি জানিব পৰা গৈছে। লগতে অহা ২৩ জুলাইত আদালতত বিধায়কগৰাকীক হাজিৰ কৰোৱাৰ নিৰ্দেশ দিছে আদালতে।
ইপিনে, কৰিমগঞ্জ আদালতৰ এই নিৰ্দেশৰ পাছতে ফেইচবুক লাইভৰ জৰিয়তে প্ৰাক্তন ছাত্ৰ নেতাজনে প্ৰতিক্ৰিয়া প্ৰকাশ কৰিছে।
লাইভ ভিডিঅ’টোত তেওঁ কয়, ‘’বহুদিন ধৰি শিলাদিত্য দেবৰ বিৰুদ্ধে আইনী আন্দোলন কৰিছিলো। শিলাদিত্য দেবৰ সাম্প্ৰদায়িক মন্তব্যৰ বিৰুদ্ধে আইনৰ দ্বাৰস্থ হৈছিলো। অনেক বাহানা দেখুৱাই তেওঁ আদালতত উপস্থিত হোৱা নাছিল। ভাৰতবৰ্ষৰ নাগৰিক হিচাপে আমি গৌৰাৱান্বিত যে ভাৰতত আইন আছে আৰু ই সকলোৰে বাবে সমান। শিলাদিত্য দেবৰ সাম্প্ৰদায়িক মন্তব্য দিয়াৰ বিৰুদ্ধে গ্ৰেপ্তাৰী পৰোৱানা জাৰি কৰিছে কৰিমগঞ্জ আদালতে। আমাৰ এই আন্দোলন কোনো বিশেষ ধৰ্মৰ বিৰুদ্ধে নহয়, সুস্থ ভাৰত গঠন কৰাৰ বাবে এই আন্দোলন।‘‘
হোজাইৰ বিধায়কগৰাকীলৈ গ্ৰেপ্তাৰী পৰোৱানা দিয়াৰ পাছতে ছাত্ৰনেতাজনে আইনজীৱি আতিকুল বাৰিকক ধন্যবাদ জ্ঞাপন কৰে।