দাবী নে ভৱিষ্যতবাণী! ত্ৰিৰংগ পতাকাৰ ঠাই ল’ব হিন্দুত্ববাদীৰ গেৰুৱা পতাকাই! ক’লে বিজেপিৰ মন্ত্ৰীয়ে

ভাৰতৰ তিনিবৰণীয়া জাতীয় পতাকা আতৰোৱা হ’ব। তাৰ সলনি দেশৰ জাতীয় পতাকা হিচাপে গণ্য কৰা হ’ব হিন্দুত্ববাদীসকলৰ গেৰুৱা পতাকা!

এইধৰণে এটা মন্তব্য কৰিছে কৰ্ণাটকৰ গ্ৰাম্যোন্নয়ন আৰু পঞ্চায়তৰাজ মন্ত্ৰী কে এছ এশ্বৰাপ্পাই।

মন্ত্ৰীগৰাকীয়ে সাংবাদিকৰ আগত কয় যে ৰাম মন্দিৰক লৈ এসময়ত মানুহে কৌতুক কৰিছিল। কিন্তু এতিয়া অযোধ্যাত সেয়া সাজি থকা হৈছে।

সেইদৰে অহা ১০০ বা ২০০ বা ৫০০ বছৰৰ ভিতৰত ভাৰতৰ জাতীয় পতাকাখনো গেৰুৱা হৈ পৰিব।

শ শ বছৰৰ আগতে শ্ৰী ৰাম চন্দ্ৰ আৰু হনুমানৰ ৰথত গেৰুৱা পতাকা আছিল। মন্ত্ৰীগৰাকীয়ে প্ৰশ্ন কৰে যে তেতিয়া কি আমাৰ দেশত তিনিবৰণীয়া পতাকাখন আছিল নেকি?

উল্লেখযোগ্য যে বিজেপিশাসিত ৰাজ্যখনত শেহতীয়াকৈ উদ্ভৱ হোৱা হিজাব বিতৰ্কই দেশজুৰি তোলপাৰ লগাই আছে।

তাৰ মাজতে মন্ত্ৰীগৰাকীয়ে দেশৰ জাতীয় পতাকাক লৈ কৰা অপমানসূচক এই মন্তব্যই ব্যাপক প্ৰতিক্ৰিয়াৰ সৃষ্টি কৰিছে।